Оскуолаҕа фотограф кэлэр буолла. Ол күн ох курдук оҥостон, суунан-тараанан, баттах кырыйтаран бэлэмнэнэн оскуолаҕа тиийдибит.
Кылааһынан көрүдүөргэ тахсан хаартыскаҕа түстүбүт. Хаартыскабыт өҥнөөх (цветной) буолара икки бүк долгутуулаах. Харчылаах оҕолор соҕотохтуу эбии түстүлэр этэ, бадаҕа. Мин ыраахтан фотограф хас биирдии хамсаныытын одуулуубун, маныыбын.
Хаартыскаҕа түһүү бүппүтүн кэннэ, аны ким дьиэтигэр илдьэн хаартыскаҕа түһэртэрэр диэн буолла. Мин: «МИН», —диэбиппин өйдөөбөккө да хааллым. — Чэ, сөп. Никитин илдьэ бараҕын, онтон салгыы ыалга сирдиигин….
Арай өйдөөбүтүм, дьиэбэр ким да суох буолар эбит. Хайдах гынабын диэн кэтэмэҕэйдии турдахпына, фотограф кэлэн мичээрдии- мичээрдии:»Чэ, бардыбыт», — диэтэ. Хап сабар таҥнаат, таһырдьаны былдьастым. Дьиэбэр баран иһэн эмискэ суолбун атын хайысха диэки, алаас үрдүнэн эдьиийим аахха тутан кэбистим. Сатаатар, тибии тибэн кэбиһэн суол суох эбит. Туораттан көрдөххө, хаартыскаҕа түһэрэр киһибиттэн куотан иһэр курдук көстөрүм буолуо. Санаабар наһаа ыксыыбын, эрдэ тиийэн эдьиийбэр быһааран, балтыларбын хаартыскаҕа түһэттэриэхпин баҕарарбын эрдэ сэрэтиэхпин баҕарабын. Ол иһэн араас санаалар киирэллэр. Арай эдьиийим сөбүлэспэтин, оо дьэ, таах сибиэ мин диэн кэбиһэн, оччотугар хаартыскаҕа түһэрэр киһини албыннаабыт курдук буолабын диэн саныы-саныы, сүүрэр икки хаамар икки ардынан, тоҥуу хаарга түһэ-түһэ эдьиийдээҕим диэки былдьастым.
Арай тиийбитим эдьиийим аах дьиэлэрин аана баттатыылаах. Албыннаабыппыттан кыбыстан сирэйим биирдэ кытар гына түстэ. Киһим бу тиийэн кэлэн: «Чэ, киириэх»,— диэтэ. Хайыахпытый, дьиэҕэ киирдэхпит дии. Хата, балтыларым барахсаттар утуйа сыталлар эбит. Кыргыттарбын ойутан туруордум уонна ууларыгар аҥаарыйа сылдьар сыгынньах оҕолору дьыбааҥҥа олордуталаан кэбистим. Фотограбым мичээрдээт: «Оҕолоргун уоскут уонна мааны таҥастарын таҥыннар», —диэтэ. Аны таҥас көрдүүр мучумааныгар түстүм, ол быыһыгар оҕолорбун иккиэннэрин көтөҕө сылдьабын. Ону-маны булан син таҥыннартаатым, иккиэн сатаан олорботулар, онон маннык үһүөн түстүбүт.
Захар Никитин
Хаартыска ааптар тиксэриитэ