«Хотугу Синергия» форум кыттыылаахтарын бырайыактара сороҕор киһини сөхтөрөр. Искусственнай мэйии, протезтар, технологичнай матырыйааллар кытта баар буолаллар. Үксүгэр «Я-ИНЖЕНЕР» хайысха кыттыылаахтара инновацияны толкуйдууллар. Биһиги бэлэм бырайыактаах ыччаты кытта кэпсэттибит.
Араас булкаастаах чэпчэки бетон
Дарья Васильева, ХИФУ инженернай-техническэй факульетын аспирана, «Хотугу Синергия-2017» форум гранын кыайыылааҕа:
— Былырыын хамаанданан сульфатостойкай портландсиэмэн бырайыагын көмүскээбиппит. Устудьуоннуу сылдьан иккис куурустан саҕалаан оҥорбуппут. Хаста да конференцияларга кыттыбытым. Хайа кумаҕын сиэмэни кытта булкуйар санаалаах этибит. 100 тыһ. солк. грант сүүйбүппүт. Ону туһанан салгыы чинчийбиппит. Билигин Дьокуускайга сульфатостойкай сиэмэни оҥорон таһаарар собуот баар. Быйыл бэйэм туспа бырайыактаах кэллим — араас булкаастаах чэпчэки бетону оҥоруу. Манна чинчийиибэр анаан химияҕа быһаарсар партнер булуохпун баҕарабын.
«Лего» конструктор курдук модульнай муоста
Екатерина Олесова, Тихоокеанскай судаарыстыбаннай университеты бүтэрбит, «Хотугу Синергия» 2017, 2018 сс. кыттыылааҕа:
— Былырыын силимнэммит маһынан оҥоһуллар муоста бырайыагынан «Я — ИНЖЕНЕР» хайысхаҕа кыттыбытым, иккис миэстэ буолбутум. Билигин «Дор Инжиниринг» хампаанньаҕа проектировщигынан үлэлибин. Аспирантурам чэрчитинэн бэйэм бырайыакпын бастаан Саха сиригэр, онтон Уһук Илиҥҥэ киллэриэхпин баҕарабын. Быйыл муостам бырайыагын модульнай гынным. Кытаанах бөҕө буолталарынан эриллэр олоххо турар буолар. Мас муосталарга үчүгэй солбук буолуон сөп. Бу бырайыакпын патенныыр санаалаахпын. Ол эрэ кэннэ олоххо киллэриэхпин сөп.
Автономнай лазернай станок
Андрей Федоров, ньиэп уонна гаас кыһалҕаларын институтун научнай үлэһитэ:
— Форумҥа бастакыбын кэллим. Сотору 35 сааспын туолабын, ону баттаһа. Манна бырайыакпын билиһиннэрэбин — программанан салайыллар автономнай лазернай станок. Мин толкуйдаатым диэбэппин, бэйэм хомуйан оҥордум. Станогунан араас матырыйаалга сурук түһэриэххэ, ону-маны уһаныахха сөп. Матырыйалтан көрөн сөп түбэһиннэриэххэ сөп.
edersaas.ru