Балаҕан ыйын 3 күнүгэр Уһук Илиҥҥи экэнэмиичэскэй форумҥа «Арассыыйаҕа инвестициялар» былаһааккаҕа омук инвестордарын кытары үлэ ырычаахтарын тупсарыы тула киэҥ кэпсэтии ыытылынна.
Росконгресс уонна «РК-Инвестициялар» пуонда Арассыыйа-Кытай дьыалабыай сэбиэтин кытары кыттыһан тэрийбит бу сиэссийэлэригэр Арассыыйа уонна Кытай бэрэстэбиитэллэрэ бииргэ үлэлээһиҥҥэ туох тирэх буоларын, туох мэһэйи оҥорорун туһунан ырыттылар.
– Тастан инвестиция киирэрэ наада, – диэтэ «Сбербанк Инвестиции» хампаанньа дириэктэрдэрин сэбиэтин салайааччы Оскар Рацин итиэннэ Арассыыйаҕа инвестиция кыаҕа элбэҕин, ол эрээри ресурса туһугар охсуһар наадатын ыйда.
Арассыыйа-Кытай инвестиционнай пуондатын (РКИФ) ыстаарсай вице-президенэ Лей Тенг болҕомтону Арассыыйа хампаанньаларыгар инвестиция бартыбыалын кэскилигэр уурарга эттэ, олор истэригэр элбэх «халаан күөҕэ фишка» баара үп-харчы өттүнэн үрдүк көрдөрүүлэри биэрэрин бэлиэтээтэ. АПК эйгэтигэр инвестициялар тустарынан кэпсэтиигэ «Легендагро Приморье» хампаанньа генеральнай дириэктэрэ Дмитрий Савенков бииргэ үлэлээһини сайыннарыы тирэҕин быһыытынан дьон ресурсатын, килиимэт табыгастааҕын, Арассыыйа бородууксуйата экология өттүнэн ырааһын итиэннэ Кытай чугаһын ыйда.
Санаа атастаһыытын кыттыылаахтара быраабыла уларыйа турара үлэни сүрүннүүр кыаҕы биэрбэтин, солкуобай сыаната түһэ, валюта кууруһа халбаҥныы турара итиэннэ сааҥсыйа баара ис ырыынагы хааччахтыылларын итиэннэ үбү угууну мэһэйдииллэрин эттилэр. Сааҥсыйа дьайыыта атын өттүттэн ыллахха, Арассыыйаны уонна Кытайы быдан чугаһаппытын «КитайСтрой» хампаанньа генеральнай дириэктэрэ Лу Хао бэлиэтээтэ. «Биһиги дойдуларбыт стратегическай партнер буоллулар, бырабыыталыстыбаларбыт бизнеһи сайыннарыыны бары өттүнэн өйүүллэр», – диэтэ кини.
Саҥа бырайыактар үөскээһиннэригэр Арассыыйа-Кытай дьыалабыай сэбиэтин үлэтэ тирэх буолар.
— Биһиги итэҕэйсии эйгэтин үөскэтэбит, онон бииргэ үлэлиэхтэрин баҕарар Арассыыйа да, Кытай да хампаанньаларыгар сүбэлиир-иһитиннэрэр өйөбүлү оҥоробут. Инвестиция өттүттэн ылан көрдөххө, Кытайдааҕы партнердарбытыгар биһиги болҕомтону Арассыыйа ордук күүстээх эйгэлэригэр, тыа хаһаайыстыбатыгар, медицинаҕа уонна технологияларга, уурарга сүбэлиибит, – диэн түмүктээтэ сиэссийэ үлэтин Арассыыйа-Кытай Дьыалабыай сэбиэтин толорооччу дирэктэрэ Евгений Маркин.
Бу туһунан Уһук Илиҥҥи экэнэмиичэскэй форум сайта иһитиннэрдэ.
Раиса Сибирякова, «Саха сирэ», edersaas.ru