Бүгүҥҥүттэн Санкт-Петербург куоракка аан дойдутааҕы XXII экономическай форум саҕаланна. Үс күн устата форумҥа араас дойду бэрэсидьиэннэрэ, Арассыыйа регионнарын лидердэрэ, биллэр-көстөр уопсастыбаннай, политическай деятеллэр, улахан хампаанньалар салайааччылара, экспертэр атах тэпсэн олорон кэпсэтиэхтэрэ.
Ил Дархан Егор Борисов салалталаах Саха сирин дэлэгээссийэтэ бүгүн Уһук Илин регионнар сайдыыларыгар, саҥа технологияны киллэриигэ туһуламмыт сессияларга сылдьыаҕа. Манна Уһук Илин регионнарга тэриллибит урутаан сайдар сирдэр тустарынан кэпсэтиэхтэрэ. Биһиги өттүбүтүттэн “Колмар” хампаанньа тыл этэрэ күүтүллэр. Егор Борисов бүгүн «British Petroleum» хампаанньа салайааччытын Роберт Дадлины, “АЛРОСА” лидерин Сергей Иванову, «Уһук Илиннээҕи энергетическэй салайар хампаанньа дириэктэрин Дмитрий Селютины кытары көрсөн кэпсэтиэҕэ. Иккис күнүгэр Национальнай рейтинг 2017 сыллааҕы түмүгүн таһаарыыга кыттыыны ылыаҕа. Ону таһынан Егор Афанасьевич РФ Судаарыстыбаннай сэбиэтин Консультациялаһар хамыыһыйатын мунньаҕар сылдьыаҕа. Арктика сайдыытыгар туһуламмыт сессия буолуоҕа. Манна Саха сирин дэлэгээссийэтэ биир сүрүн миэстэни ылыаҕа.
Үгэс курдук, Саха сирэ форумҥа дуогабардары түһэрсиэҕэ. Былырыын бу форум былаһааккатыгар биһиги өрөспүүбүлүкэбит “Газпром” хампаанньаны кытары 2026 сылга диэри гаастааһыҥҥа бииргэ үлэлэһэр бырагырааматын бигэргэппитэ. Егор Борисов уонна хампаанньа лидерэ Алексей Миллер дуогабарга илии баттаспыттара. Ол чэрчитинэн, өрөспүүбүлүкэҕэ араас тутуу барыаҕа. Маны таһынан Егор Афанасьевич былырыын “РусГидро” хампаанньа салайааччытын Николай Шульгинову кытары Саха сирин энергетикатын сайдыытыгар дуогабар түһэрсибитэ.
Форумҥа РФ бэрэсидьиэнэ Владимир Путин кыттар. Быйылгы тэрээһиҥҥэ Франция бэрэсидьиэнэ Эммануэль Макрон, Япония премьер-миниистирэ Синдзо Абэ, Валюта аан дойдутааҕы фондатын дириэктэрэ Кристан Лагард, Кытай Народнай Өрөспүүбүлүкэтин бэрэссэдээтэлин солбуйааччы Ван Цишань кэлиэхтэрэ.
Ыспыраапка: Бу форум 1997 сылтан ыытыллар. 2006 сылтан саҕалаан РФ бэрэсидьиэнин салалтатынан барар. Быйылгы форум “Эрэллээх экономиканы сайыннаран” диэн тиэмэлээх ыытыллар. “Арассыыйа: сайдыы суолун тутуһан”, “Бастыҥнар технологиялара”, “Уларыта тутуу кэмигэр глобальнай экономика”, “Цифровой экономикаҕа киһи сайдыыта”, “Инникибит туһунан кэпсэтии” диэн хайысхалар үлэлиэхтэрэ.
Аграфена КУЗЬМИНА, edersaas.ru