Дьокуускайга атыы-эргиэн уонна общественнай аһылык форума ыытыллыаҕа
1923 с. тохсунньу 21 күнүгэр эргиэн уонна бырамыысыланнас норуодунай комиссариата төрүттэммитэ. Маҥнайгы комиссарынан Өлүөхүмэттэн төрүттээх Андрей Бахсыров анаммыта. Атыы-эргиэн эйгэтигэр биир кэлим судаарыстыбаннай ситим тэриллибитэ 95 сылыгар анаммыт эргиэн уонна общественнай аһылык үлэһиттэрин I Өрөспүүбүлүкэтээҕи форума муус устар 12-13 күннэригэр Дьокуускай куоракка ыытыллыаҕа.
«20 улуустан Сахабыт сирин киин куоратыттан 400-чэкэ урбаанньыт хас да сиринэн мустан, үлэлэрин бүгүҥҥү кыһалҕаларын, ситиһиилэрин, инники былааннарын тула санааларын атастаһыахтара, сэминээргэ кыттан, идэлэрин таһымын үрдэтиэхтэрэ.
Бастакы күнүгэр «Куруһаала» атыы-эргиэн киинигэр 10ч. тэрээһин аһыллыытын кэнниттэн тустаах министиэристибэлэр, СӨ атыы-эргиэн бырамыысыланнай балаатата, Роспотребнадзор Саха сиринээҕи управлениета, профсоюзтар кэпсэтиини көҕүлээн ыытыахтара. Холобур, сорох маҕаһыыннарга дьон хамнастарын кэмбиэргэ ылаллар, пенсионнайга, нолуогабайга туох да усунуос төлөммөт. Мантан сылтаан бу үлэһит биэнсийэтэ ааҕыллыбат, судаарыстыбаҕа нолуок төлөммөт. Итини хайдах быһаарыахха сөбүн форум кыттааччылара дьүүллэһиэхтэрэ”, — диэн Родион Федоров, Атыы-эргиэн бырамыысыланнай балаататын Саха сиринээҕи сойууһун вице-бэрисидьиэнэ иһитиннэрдэ.
Иккис күнүгэр 9ч. 30 мүн. Экэниэмикэ министиэристибэтин конференц-саалатыгар онлайн-каасса, итирдэр утах атыытын судаарыстыба хонтуруоллуурун, «күлүк бизнес», № 44-дээх федеральнай сокуонунан атыылаһыы туһунан төгүрүк остуоллар дьону түмүөхтэрэ.
Биллэрин курдук, дьон билигин үксэ маҕаһыыннарга баан карточкатынан төлөһөр. Дьокуускай уокуругун дьаһалтатын конференц-саалатыгар розничнай бизнескэ IT сервис өтөн киирэн, электроннай атыы-эргиэн тула кэпсэтии эмиэ ити күн 14ч. ыытыллыаҕа.
Кэлиҥҥи кэмҥэ бэлэм аһы үлэҕэ, эбэтэр дьиэҕэ сакаастааһын киэҥник тарҕанна. «Ас-үөл индустрията туһанааччыга утары хардыылыыр» экспертнэй-аналитическай сессияҕа аһылыгы сакаастааһын, ону тиэрдии туһунан «Куруһаалаҕа» 10ч. кэпсэтиэхтэрэ.
Билигин дьон бириэмэтин, харчытын харыстаан, интэриниэт нөҥүө таҥас-сап, миэбэл, дьиэ тэрилин барытын сакаастаан, чэпчэки сыанаҕа ылар. Оттон сорох атыы-эргиэн кииннэрэ атыылаһааччыта суох чуҥкуйан олороллор. Кинилэр атыыларын хайдах гынан элбэтэргэ, үлэ көдьүүһүн улаатыннарарга сэминээргэ сылдьан, билиилэрин хаҥатыахтара.
Түмүккэ бариста SCAE аан дойдутааҕы сертипикээттээх Вячеслав Соломатов кофе оҥорорго мастер-кылаас көрдөрүөҕэ уонна да атын бизнес-тренердэр общественнай аһылык, атыы-эргиэн үлэһиттэригэр идэлэрин кистэлэҥин кэпсиэхтэрэ.
Тутуу ырыынагар килиэп бородууксуйатын быыстапка-дьаарбаҥката муус устар 14-15 күннэригэр ыытыллыаҕа.
Итинник киэҥ бырагырааммалаах форумҥа атыы-эргиэн, общественнай аһылык үлэһиттэрэ көхтөөхтүк кэлэн кытталларыгар, бу эйгэҕэ туох саҥа баарын билсэллэригэр ыҥыраллар.
Марианна Тыртыкова, «Саха сирэ» хаһыат, edersaas.ru