Чараҥ

ФИЗКУЛЬТУРНИК күнүнэн!

Сэрээккэнэн үгүс дьоҥҥо спортсмен дьарыгырар диэн өйдөбүл баар. Эбэтэр сорох киһи сүөһү, теплицэ, дьиэ үлэтэ бэйэтэ сэрээккэ диэн өйдүүр.
Сэрээккэ диэн биир ураты киһи туругун тупсарар, сүһүөх да ыарыытын чөлүгэр түһэрэр, киһи санаатын көтөҕөр, өйү да чөллөрүтэр диэн мин бигэтик биллим.
Мин икки тобугум, хаҥас бүлгүнүм утуу-субуу ыалдьаннар хирург сүбэтинэн 60 саастаахпар сэрээккэ оҥорон саҕалаабытым. Билигин 68 сааспын аастым. Сэрээккэбин хайдах да сүрэҕэлдьээтэрбин оҥоро сылдьабын, сүһүөх ыарыытыттан биир да мааһа да, эмэ да суох босхолонон үөрүү, дьол!
Сэрээккэбэр сыыйа атынтан атын эрчиллиини эбэн, билигин киһи мыыммат хамсаныыларын оҥороробун, астынабын.
Сарсыардам сэрээккэттэн саҕаланар. «Тэтимнэри» истэ-истэ ыскакаалкалаан ойобун. Турук, дууһа тэҥҥэ барсар.  Табылларын тухары хоһоон суруйабын.
Ким хайдах сатыырынан сэрээккэлээҥ диэн ыҥырабын.

СЭРЭЭККЭ

Сэрээккэнэн саҕалыаҥ
Күнүҥ сэргэх буолуоҕа,
Сэрээккэттэн дьэ чахчы
Чэбдик буолуо туругуҥ.

Уҥа-хаҥас уунаҥнаан
Сүһүөхтэрбин үөрдэбин,
Эргичийэ эрчиллэн
Иһиллиибин турукпун.

Сылбырҕатык хамсанан
Сэниэлэнэ түһэбин,
Кыра дьаҥы, кырдьары
Кыйдаһабын күннэтэ.

Сэрээккэлиир буоллахха
Сырдык санаа
саҕыллар,
Сэрээккэни сэнээмэҥ —
Сэкириэтэ дьэ дьикти!

 ХОНУУ СИБЭККИТЭ

Хараҕы манньыта,
Сүргэни көтөҕө
Куулаҕа сибэкки
Хойуутук да үүммүт!

Бүччүм сир буланнар
Бүөбэйи билбэккэ,
Бэлэм уу булбакка
Хорсуннук үүммүттэр!

Куйааска хаппакка
Күн диэки тардыһыы,
Хаҕыс тыал хаптаччы
Үрэрин тулуйуу!

Биир сиргэ тэнийэн
Сэлэлии үүммүтүн
Сэҥээрэ сэргээтим
Бу хонуу симэҕин!

Кып-кыра эрээри
Кэп-кэрэ көстүүлээх!
Уп-уһун үйэҕэ
Үүнүөм диэн эрэллээх!

Нап-нарын бэйэтэ
Чап-чараас эйгэлээх!
Сып-сырдык санааны
Саҕарга аналлаах!

АРДАХ

Ардах киһи кэриэтэ
Уһун, кылгас буолааччы,
Киһи ардах кэриэтэ
Намыын, дохсун майгылаах.

Уһун ардах салгытар,
Кылгас ардах абырал.
Намыын ардах уоскутар,
Дохсун ардах уйгуурдар.

Тыынар, тыыммат даҕаны
Майгыннаһар — дьэ дьикти!
Айылҕалыын сибээспит
Оннук күүстээх буоллаҕа.

Ол да иһин сиэрдээхтик
Айылҕалыын алтыһан
Сэмэй сыһыан, харысхал
Айылҕаҕа баар буоллун!

                                                          Полина-Победа,
Уус Алдан.

0
0
Telegram Whatsapp