Өрөспүүбүлүкэтээҕи наркологическай диспансер бэйэтин үлэтин хаачыстыбатын биллэрдик тупсарда – наркология, реабилитация отделениеларыгар, диспансер уонна поликлиника физиокабинеттарыгар аныгылыы физиотерапевтическай аппаратуралары атыыластылар, быраастар уонна сиэстэрэлэр «физиотерапия» хайысхатынан эбии үөрэхтээһини аастылар. Бу маннык үлэ салгыы ыытыллыа диэн СӨ Ыччакка уонна социальнай коммуникацияларга министиэристибэтэ иһитиннэрэр.
Наркотическай сүһүрдүүттэн биир кэлимсэ эмтэнии барара ордук хаачыстыбалааҕа билиннэ. Оттон, биллэрин курдук, наркомания киһи доруобуйатын, лиичинэс быһыытынан сиэрин-майгытын, психикатын эмиэ «биир кэлимсэ» сүһүрдэр. Ол иһин сүһүрдүүттэн эмтэнии бырагырааматыгар физиотерапия эмиэ улахан суолталааҕын исписэлиистэр бигэргэтэллэр.
Физиотерапия наркоманияны утары эмтэниигэ суолтата
Физиотерапия уопсай туһатын таһынан маннык эмтэнии дьайыылара туһалаахтара билиннэ:
— Ыарыһах ньиэрбинэй систиэмэтин сымнатыы.
Физиотерапевтическай эмтэнии суолтата диэн, наркоман олоҕор көрсөр кыһалҕаларыгар, ол эбэтэр стресскэ, дьиэ кэргэн, үлэ кэлэктиибин мөлтөх психологическай килиимэттэригэр утарсар кыахтанар. Аҥаардас медикаментознай эрэ эмтэнии кэнниттэн пациент наркотическай сүһүрүүгэ төннөрө үгүс буолар. Физиотерапевтическай көрүҥнэринэн эмтэниини ааспыт киһи ньиэрбинэй систиэмэтэ сымныыр уонна бөҕөргүүр, утуйар уутун кэһиллибитэ ааһар, стресскэ бэринимтиэтэ суох, психоэмоциональнай туруга наар биир тэҥ буолар. Онон ыарыһахтар саҥаттан наркотическай дьайыыга киириилэрэ биллэрдик аҕыйыыр.
— Ыарыһах организмыгар барар процесстары чөлүгэр түһэрии.
Наркотик киһи физическэй доруобуйатын улаханнык буорту оҥорор, ону чөлүгэр түһэриигэ улахан болҕомто ууруллуохтаах. Ол иһин ыарыһах ис уорганнарыгар сөптөөх аһатар бэссэстибэлэр, кислород хаан нөҥүө киириитин хааччыйыы барыахтаах. Лимфалар уларыйыылара сүһүрдэр токсиннар тахсалларын уонна иммуннай систиэмэ күүһүрэрин хааччыйыахтаах. Сөптөөх физиотерапия куурсун ааспыт ыарыһах доруобуйата түргэнник чөлүгэр түһэр, эмтэнии бириэмэтэ кылгыыр.
Физиотерапевтическэй көрүҥнэр ыарыһах абстиненция туруга ааһан чөлүгэр түһэр, ол аата, реабилитацияланар кэмигэр туттулларын исписэлиистэр наар ирдииллэр, арай олус улахан физическэй уонна психическэй сүһүрүүнү ылбыт буоллаҕына медикаментознай эмтэнии ыытыллар.
Физиотерапия ордук көмөлөөх, өскө ыарыһах ис уорганнарын эмсэҕэлэниитин медикаментознай коррекцияламмыт буоллаҕына уонна бэйэтэ психотерапия куурсун толору ааспыт буоллаҕына.
2021 сылтан диспансерга үс физиокабинет үлэлиир, кинилэр олохтоох дарсонвализация, транскраниальнай электростимуляция, электрофорез, магнитотерапия, УВЧ уонна комплекснай реабилитационнай «Альфа-капсула» тииптээх аныгылыы тэриллэринэн хааччылыннылар. Маннык биир кэлимсэ эмтэниини 400 тахса пациент ааста, кинилэргэ барыта
4 000 тахса физиотерапевтическэй процедура ыытылынна.