Муус устар 13-15 күннэригэр Дьокуускайга маастар-былааны оҥоруу куонкуруһугар финалистарга аналлаах сэминээр буола турар. Тэрээһин кэмигэр кыттааччылар куораппыт уратытыттан саҕалаан социальнай-экэнэмиичэскэй, култуурунай, научнай хайысхаларга эспиэрдэр санааларын, сүбэлэрин-амаларын истиэхтэрэ.
Бу иннинэ Ил Дархан Айсен Николаев билигин Дьокуускай куоракка креативнай экэниэмикэ, экотуризм тэтимнээхтик күүскэ сайдыахтааҕын, сыыппара индустриятын инфраструктурата тэтимнээхтик тэриллиэхтээҕин уонна үрдүк таһымнаах исписэлиистэри бэлэмниир сорук турарын эппитэ.
Ил Дархан иһинэн Архитектураҕа уонна куораты тутууга управлениетын салайааччы, кылаабынай архитектор Ирина Алексеева иһитиннэрэринэн, куонкурус финалистара Дьокуускайга пилотнай дэниллэр территорияларыгар сылдьан, ураты тутуулары, сүрүн инфраструктурнай бырайыактары кытта билсибиттэр. Ол курдук, IT-пааркаҕа, «Үлэ кыбартаалыгар», өрүс пуордугар баар «Lena Pillars» оройуоҥҥа, 31-с түөлбэҕэ, аппа уҥуор (залог), байыанннай чаас түөлбэтигэр сылдьыбыттар. Ону тэҥэ, «Кырдьаҕас куорат-2» бырайыак кэнсиэпсийэтин кытта билсибиттэр.
Бүгүн, муус устар 14 күнүгэр, сүрүн инвестиционнай былаһааккаларга, инфраструктурунай бырайыактарга, эбийиэктэргэ сылдьыахтара. «Биһиги куорат сүрүн сирин-уотун барытын көрүөхтээхпит. Бэҕэһээ сүрүн инвестиционнай былаһааккаларга сырыттыбыт. Маннык сылдьан көрбүттэрэ-истибиттэрэ олус үчүгэй, финалистар куорат дьаһалтата туруорбут соругун быһааралларыгар көдьүүстээх буолара чуолкай», — диэн Ирина Алексеева баһаарар.
Куорат олохтоохторуттан 80-ча идиэйэ куонкурус финалистарын көрүүлэригэр бэриллэр диэн «Киин» аналитикаҕа бөлөҕүн салайааччыта Мария Седлецкая иһитиннэрэр. «Куонкурус икки түһүмэхтээх. Бастакы түһүмэх икки нэдиэлэтээҕитэ түмүктэммитэ, финалистар быһаарыллыбыттара. Түөрт ый устата сөптөөх матырыйааллары хомуйдубут. Ситэриилээх былаас уорганнарын уонна тутар хампаанньалар салайааччыларын, исписэлиистэрин кытары көрсөн кэпсэттибит. Ону тэҥэ, куорат олохтоохторуттан блиц-ыйытыылары хомуйдубут. Барыта 80-тан тахса санаа киирдэ», — диэн Мария Седлецкая кэпсээтэ.
Санатар буоллахха, куонкуруска этиилэр бэс ыйын 28 күнүгэр диэри түмүллүөхтээхтэр. Кыайыылаах аата от ыйыгар дьүүллүүр сүбэ түмүк мунньаҕар биллиэҕэ.