«Саха сирин киэн туттуута» бириэмийэ «Саҥаны айааччы» номинациятыгар финалистары сүүмэрдиир куоластааһыҥҥа бастакы кыайыылаахтар ааттара билиннэ.
edersaas.ru
Ол эрээри бу көрдөрүү билиҥҥитэ тугу да быһаарбат. 35 күөн күрэстэһээччиттэн биэс финалиһы талан быһаарыыга өссө да икки күн баар.
Сэтинньи 21 күнүнээҕи туругунан бастаан иһэллэр:
Виктория Кравец, 24 №-дээх лицей учуутала, Нерюнгри оройуона, 51 саастаах. 1-11-с кылаас оҕолоругар физкултуура бырагырааматын айбыт ааптар. 668 куоластаах, онтон 89 — социальнай ситимнэргэ.
Елена Бушман, нуучча тылын уонна литературатын учуутала. Литературнай гостинайы, нуучча тылын олимпиадатыгар, эксээмэҥҥэ бэлэмнэнии технологиятын айан оҥорбут. 54 саастаах. Нерюнгри оройуона. 667 куоластаах, онтон 70-на — социальнай ситимнэргэ.
Наталья Борисова, 39 саастаах Дьокуускай к. олохтооҕо. Ykt.botanic пиэрмэҕэ доруобуйаҕа туһалаах күөх үүнээйини үүннэрээччи. 587 куоластаах, онтон 236 — социальнай ситимнэргэ.
Иннокентий Уран, станоктары айааччы, Дьокуускай к. олохтооҕо. 448 куоластаах, онтон 237 — социальнай ситимнэргэ.
Анатолий Чомчоев — атомнай генератор бырайыагын ааптара, 66 саастаах Дьокуускай к. олохтооҕо. 437 куоластаах, онтон 419 — социальнай ситимнэргэ.
Куоластааһын түмүгүнэн финалистар ааттара уларыйыан сөп. Ол курдук, уу кээмэйин билэр датчик ааптара, Бэрдьигэстээх орто оскуолатын 11-с кылааһын үөрэнээччитэ Аэлита Ефимова, Чурапчы олохтооҕо Иннокентий Новгородов араас тииптээх массыынаны «ититэр уонна тымнытар» тэрил ааптара. Хоту сир усулуобуйатыгар туттуллар саҥа ньыманы тутуһан, Томпо улууһун Ыҥаа оскуолатын 11-с кылааһын үөрэнээччитэ Айаал Охлопков автоматизированнай тэпилииссэни толкуйдаан оҥорбут. Бу ааттаммыт күөн күрэстэһээччилэр бүгүҥҥү кыайыылаахтарга тилэх баттаһан иһэллэр.
Сэтинньи 23 күнүгэр диэри ФИНАЛИСТАРЫ ТАЛЫЫГА КУОЛАСТААҺЫН GOLOS.YSIA.RU, Вконтакте, Instagram, Facebook СОЦИАЛЬНАЙ СИТИМНЭРИНЭН ЫЫТЫЛЛАР.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр, интэриэстэригэр таба тайаммыт, үлэттэн, таптыыр дьарыктарыттан дьоллонор дьону кэмигэр бэлиэтээн көрүү буолар. Кинилэргэ махтал тылларын саамай үлэлэрин, айар-тутар кэмнэрин үөһүгэр сырыттахтарына этэн үөрдүү.
«Саха сирин киэн туттуута» норуот бириэмийэтин генеральнай спонсора — «Көмүлүөк» саха иһитин оҥорор фирма.
Елена ПОТОЦКАЯ, «Саха сирэ» хаһыат, edersaas.ru