Өрөспүүбүлүкэни сылааһынан хааччыйар «СӨ ОДьКХ» ГУП хамсык кэмигэр тохтоло суох үлэлээтэҕинэ, кыстыгы этэҥҥэ аһарыахпыт. Ол туһугар тэрилтэ хайдах дьаһанар эбитий?
“СӨ ОДьКХ” ГУП-ка эпидемиологическай балаһыанньаны уонна COVID-19 тарҕаныытын утары дьаһаллары дьүүллэстилэр. “СӨ ОДьКХ” ГУП генеральнай дириэктэрэ Виталий Чикачев өрөспүүбүлүкэ оройуоннарыгар дьаҥ тарҕаммыт оройуоннарын производственнай филиалларын дириэктэрдэрин кытта видеокэмпириэнсийэ ыытта.
Суһал ыстаап кыттыылаах мунньахха үөскээбит балаһыанньаны уонна дьаҥ тарҕаныытын бохсууга тэрилтэлэргэ туох миэрэлэр ылыллалларын дьүүллэстилэр. Филиаллар салайааччылара хааччахтааһын кэмигэр билиҥҥи балаһыанньаны, сэрэтэр миэрэлэр уонна харыстанар сириэстибэлэр төһө баалларын туһунан кэпсээтилэр.
Виталий Чикачев дириэктэрдэргэ үлэ хаамыытын кэмигэр муҥутуур куттала суох усулуобуйаны тэрийэргэ, бары санитарнай ирдэбиллэри тутуһарга уонна үлэһиттэргэ сэрэтэр үлэни ыытарга сорудахтаата.
Кулун тутар ортотуттан “СӨ ОДьКХ” ГУП бары сэрэтэр сүбэлээһиннэри тутуһан, үлэ тохтообокко ыытылла турар. Эбийиэктэргэ көҥүлүнэн (пропуһунан) киириллэр, үлэһиттэр доруобуйаларын туругун күннэтэ кэтээн көрүү ыытыллар, маасканы кэтии булгуччу тутуһуллар.
Маны сэргэ 850 үлэһит дьиэтиттэн олорон үлэлиир, кинилэртэн 65 сааһын ааспыт 337 киһи маннык эрэсиимҥэ киирбитэ, больничнай ылбыта эбэтэр уоппуска бэриллибитэ. Үлэлиир сирдэргэ күҥҥэ хаста даҕаны дезинфекциялыыр сириэстибэлэри туһанан сууйуу-сотуу ыытыллар, сабыылаах көрүҥнээх ультрафиолетовай бактерициднай облучателлэринэн салгыны ыраастаталлар.
Хааччахтааһын киириэҕиттэн филиалларга анаан 298 тыһ. харыстанар мааска, 15 тыһ. лиитэрэ антисептик, пирометрдар, салгыны ыраастыыр тэриллэр уонна ыраастыыр генератордар атыылаһылыннылар.
“Үрдүк бэлэмнээх буолуу эрэсиимигэр сөптөөхтүк дьаһаннахха, тэрилтэ этэҥҥэ үлэлии-хамсыы олоруон сөп”, — диэн түмүккэ генеральнай дириэктэр бэлиэтээтэ.
ГУП пресс-сулууспатын матырыйаалынан.
Бэлэмнээтэ Женни Стрюкова.
Хаартыска: тустаах ГУП саайтыттан