Уопсастыба Успуорт

FIFA-2018: Франция дуу? Хорватия дуу?

Дойдубутугар ыытылла турар футболга аан дойду чөмпүйэнээтэ бүтэрэ биир күн хаалла.

Ый устата футболу таптааччылар умсугуйан туран тыҥааһыннаах киирсиилэри көрдүлэр. Бу чөмпүйэнээккэ Аргентина, Бразилия, Португалия, Германия, Испания  күүстээх хамаандалара эрдэ туорааннар, бириистээх миэстэ иһин киирсии Европа хамаандаларын иһигэр буолла.

Бэҕэһээ үһүс миэстэ иһин киирсиигэ Англия хамаандата Бельгия хамаандатын кытта кииристэ. Футбол төрүттээччилэрин бельгиялар холкутук 2:0 ахсаанынан кыайан, аан дойду чөмпүйэнээтин боруонса призерунан буоллулар.
Бүгүн түүн Саха сирин бириэмэтинэн 00:00 чааска, Франция уонна Хорватия хамаандалара финалга киирсиэхтэрэ.

Арассыыйатааҕы уопсастыбаннай санаа киинэ ыыппыт ыйытыгынан, 35% киһи Хорватияҕа уонна 31% киһи Францияҕа ыалдьар эбит. Санатан эттэххэ, финал 1/4 -гэр Арассыыйа хамаандатын Хорватия хамаандата пенальтинан кыайбыта. Ол эрэн, ыйытыллыбыт дьонтон 41%-на Франция кыайар дии саныыр. 39%-на Хорватия чөмпүйүөннүүр диир. Бу дьонтон 61%-на финалы көрөрүн бигэргэппит.

Айтал Керемясов, футбол сүгүрүйээччитэ:
— Мин санаабар, Франция хамаандатын кимэн-киирээччилэрэ быдан түргэттэр уонна көмүскээччилэрэ хорваттардааҕар таһыччылар. Инники да оонньууларын көрдөххө, Франция утарсааччыларын барыларын холкутук кыайбыта. Хорватия барыларын кытта тэҥнээхтик оонньоон, пенальтинан, эбэтэр эбиллибит бириэмэҕэ кыайбыта. Ол иһин, аан дойду чөмпүйэнээтигэр Франция чөмпүйүөннүүр дии саныыбын.

Николай Попов, «Саха сирэ» хаһыат, edersaas.ru

0
0
Telegram @edersaas20

Добавить комментарий