Татарстаҥҥа устудьуоннар уонна үөрэнээччилэр бэстибээллэрэ саҕаланна
Бэҕэһээ, ахсынньы 10 күнүттэн, Татарстан Казань куоратыгар норуоттар икки ардыларынааҕы бэстибээл саҕаланна. Үөрэнээччилэр уонна устудьуоннар үс күн устата Арассыыйа уонна СНГ түүр тыллаах норуоттарын литератураларын билиигэ күрэхтэһиэхтэрэ. Бэстибээл Лев Толстой аатынан Казань федеральнай университетын баазатыгар ыытыллар.
Манна Арассыыйа 11 эрэгийиэниттэн (Алтай, Башкортостан, Бурятия, Кабардино-Балкария, Калмыкия, Коми, Мордовия, Татарстан, Хакасия, Чувашия, Саха сирэ) уонна СНГ түөрт дойдутуттан (Азербайджан, Казахстан, Киргизия, Узбекистан) 130 устудьуон уонна үөрэнээччи муһунна. Бу бэстибээлгэ кэтэхтэн ыытыллыбыт эрэгийиэннээҕи түһүмэх кыайыылаахтара кэллилэр. Бастакы түһүмэххэ икки тыһыынчаттан тахса киһи кыттыбыта биллэр. Онно үөрэнээччилэр эссе, оттон устудьуоннар научнай ыстатыйа суруйбуттара.
Бэстибээлгэ Саха сирин хамаандата кытта сылдьар — биэс үөрэнээччи, икки ХИФУ устудьуона. Бэҕэһээ тэрээһин үөрүүлээх арыллыыта ыытыллыбыта, оттон бүгүн күрэхтэһэн саҕалаатылар. Тылбааска уонна дорҕоонноохтук ааҕыыга илин-кэлин түсүһүөхтэрэ. Маны таһынан, кыттааччылар университетынан, мусуойдарынан, бэлиэ сирдэринэн экскурсиялыахтара, национальнай литература кыһалҕаларынан “төгүрүк остуолларга” кыттыахтара, Татарстан суруйааччыларын, бэйиэттэрин, тылбаасчыттарын кытта кэпсэтиэхтэрэ уонна КФУ эспиэрдэрин лиэксийэлэригэр сылдьыахтара.
Үөрүүлээх арыллыы кэмигэр КФУ бастакы проректора Рияз Минзарипов: “Маннык киэҥ хабааннаах бэстибээл биһиги университеппытыгар ыытылларыттан олус үөрэбит. Кэнники кэмҥэ дьон ааҕара элбээтэ. Ыччат тылы Интэриниэттэн буолбакка, классиктар айымньыларын ааҕан үөрэтиэхтээх, билиэхтээх. Литератураны билии – киһи култууратын бэлиэтэ”, — эҕэрдэлиир диэн КФУ медиапортала иһитиннэрэр.
Бэстибээл Саха сиринээҕи операторынан С.Н.Донской-II аатынан Үөрэхтээһини сайыннарар уонна квалификацияны үрдэтэр институт үлэлиир.
Айтана Аммосова, edersaas.ru