Олунньу 14 күнүгэр Чурапчы улууһун Сэмэн Дмитриевич Флегонтов аатынан Хадаар орто оскуолатыгар улахан кылаас оҕолоругар аналлаах III өрөспүүбүлүкэтээҕи физико-математическай хайысхалаах Федотовскай ааҕыылар буоллулар.
Федотовскай ааҕыылар “Өрөспүүбүлүкэтээҕи инвестиционнай хампаанньа” генеральнай директора, Чурапчы улууһун, Одьулуун, Хадаар, Чурапчы нэһилиэктэрин бочуоттаах олохтооҕо, Арассыыйа бочуоттаах тутааччыта, СӨ норуотун хаһаайыстыбатын үтүөлээх үлэһитэ Александр Иванович Федотов сырдык аатын кэриэстээн, үлэлэрин үйэтитэн, үһүс төгүлүн үрдүк таһымнаахтык тэриллэн аастылар. Быйыл 14 оскуолаттан уопсайа 27 оҕо, Чурапчы оскуолаларыттан уонна Бүлүү куораттан кыттыыны ыллылар.
Инники ыытыллыбыт күрэхтэһиилэр тустарынан сырдатар буоллахха, 2015 с. өрөспүүбүлүкэбит араас муннугуттан барыта 42 оҕо кыттыыны ылбыта. Үс түһүмэх түмүгүнэн муҥутуур кыайыылаахтарынан Төлөй орто оскуолатыттан Егор Сивцев уонна Чурапчы орто оскуолатыттан Лена Сивцева буолбуттара.
Былырыыҥҥы күрэхтэһиигэ үс улуустан — Чурапчыттан, Тааттаттан, Томпоттан 49 үөрэнээччи кыттыбыта. Тыҥааһыннаах киирсии кэнниттэн С.К. Макаров аатынан Чурапчы гимназиятын үөрэнээччитэ Милена Захарова кыайыылаах үрдук аатын ылары ситиспитэ. Кыайыылаах оҕолор бу күрэхтэһииттэн куорсун анньынан күн бүгүн ситиhиилээхтик үөрэнэ сылдьалларыттан киэн туттабыт.
Күрэхтэһии үс түhүмэхтэн турар: физика уонна математика предметтэригэр олимпиада, А.И.Федотов хоhоонун уус-ураннык ааҕыы, бырайыак көмүскээһинэ.
Бу куонкурус оҕо эргиччи хайысхалаах сатабылын туhанан, бэйэ кыаҕын, дьоҕурун арыйыыга улахан суолтаны уурар. Сахабыт сирин киэн туттар, тарбахха баттанар биир бастыҥ салайааччыбыт, саха хоhууна, амарах аҕа, үтүө кэргэн, доҕор Александр Иванович Федотов кылгас чаҕылхай олоҕор ситиспит ситиhиилэрин, кыайыыларын кэлэр көлүөнэҕэ холобур оҥостон ыытыллар күрэскэ суолтаны ууран кыттыыны ылар үөрэнээччилэри үгүс туhааннаах сүбэни-аманы, билиини ылаллар диэн үрдүктүк сыаналыыбыт.
Ол курдук, бастакы түһүмэххэ оҕолор физика уонна математика олимпиадатыгар бэйэлэрин билиилэрин тургутан көрдүлэр. Кыайыылаахтарынан 9-с кылаастарга С.А. Новгородов аатынан Чурапчы орто оскуолатын үөрэнээччитэ Инна Ортоюкова, 10-с кылаастарга И.Е. Федосеев-Доосо аатынан Дириҥ орто агро-оскуолатын үөрэнээччитэ Арианна Корякина, 11-с кылаастарга Төлөй орто оскуолатын үөрэнээччитэ Айыллаана Захарова буоллулар.
Хоһоон ааҕыытын түһүмэҕэр оҕолор олус үчүгэйдик, истиҥ иэйиилээхтик толороннор, дьон болҕомтотун тартылар. Түмүккэ, улахан мөккүөр кэнниттэн, Арианна Корякина таптал туһунан хоһоону олус долгутуулаахтык, дьоҥҥо тиийэр гына ааҕан, бастакы миэстэни ылла. Иккис миэстэни С.Д. Флегонтов аатынан Хадаар орто агро-оскуолатын выпускницата Тоня Лукина ылла. Кини эмиэ таптал туһунан хоһоону бэйэтэ үс тылынан тылбаастаан дьон сэҥээриитин ылла. Үһүс миэстэҕэ икки оҕо тигистэ: ыраах Бүлүү улууһуттан кэлбит, гимназия 9-с кылааһын үөрэнээччитэ Мотя Егорова уонна Болот Боотур аатынан Хатылы орто оскуолатын 10-с кылааһын үөрэнээччитэ Артем Саввин.
Бырайыак көмүскээһинин түһүмэҕэ биэс хайысханан буолла:
1. «Развитие творческого потенциала личности» хайысхаҕа С.Д. Флегонтов аатынан Хадаар орто агро-оскуолатын выпускницата Тоня Лукина бастаан, үөрүүтэ-көтүүтэ үрдээтэ.
2. «Предпринимательская деятельность» хайысхаҕа кыайыылаах үрдүк аатын И.Е. Федосеев-Доосо аатынан Дириҥ орто агро-оскуолатын 10-с кылааһын үөрэнээччитэ Софья Тарасова ылла.
3. “Благотворительная деятельность” хайысха муҥутуур кыайыылааҕынан С.Д. Флегонтов аатынан Хадаар орто агро-оскуолатын 11-с кылааһын үөрэнээччитэ Рита Рахматуллина таҕыста.
4. “Управление и лидерство” хайысхаҕа С.А. Новгородов аатынан Чурапчы орто оскуолатын 9-с кылааһын үөрэнээччитэ Коля Аммосов инники күөҥҥэ таҕыста.
5. «Политика – инструмент развития народа» хайысхаҕа С.А. Новгородов аатынан Чурапчы орто оскуолатын 9-с кылааһын үөрэнээччитэ Витя Филиппов кыайыылааҕынан тахсан, үөрүү өрөгөйүн биллэ.
Быйылгы күрэскэ үс түhүмэх түмүгүнэн Чурапчы оройуонун Дириҥ орто оскуолатын 10-с кылааhын үөрэнээччитэ Арианна Корякина кыайыылааҕынан буолла. Онон киниэхэ РИК ААК анал бирииhэ туттарылынна.
Бу куонкурус ыытылларыгар РИК ААК дириэктэригэр, “Үүнэр көлүөнэ фондата” тэрилтэ салайааччытыгар, Үөрэх уонна наука, Ыччат бэлиитикэтин министиэристибэлэригэр, суруйааччылар сойуустарыгар, «Чурапчы оройуона» МТ үөрэҕин управлениетыгар, Александр Федотов кэргэнигэр Марианна Ивановнаҕа-Намыынаҕа төһүү күүс буолалларыгар тэрийээччилэр ааттарыттан махталбытын тиэрдэбит.
“Хадаар нэһилиэгэ, оскуола үлэһиттэрэ, үөрэнээччилэрэ бары киэн туттар, холобур оҥостор, үтүөкэннээх киһибитин А.И. Федотовы сырдатар, саныыр-ахтар күрэспит аны 2021 сылга буолар. Онно өрөспүүбүлүкэ араас муннуктарыттан элбэх кыттааччы кэлэригэр үлэлэһиэхпит диэн былаанныыбыт. Кыттыбыт оҕолор, салайааччылар бары сүргэлэрэ көтөҕүллэн, үрдүк сыанабылы биэрэн, махтанан, инникигэ элбэх баҕа санааларын этэн, үөрэн-көтөн тарҕастылар” – диэн оскуола коллектива, үөрэнээччилэр санааларын үллэстэллэр.
Кэлэр IV Федотовскай ааҕыыларга барыгытын ыҥырабыт.
edersaas.ru саайтка анаан
Василий Семенов, күрэс дьүүллүүр сүбэтин чилиэнэ, Дьокуускай куорат 7-с №-дээх оскуолатын учуутала,
Лидия Лукина, Хадаар орто оскуолатын дириэктэри иитэр үлэҕэ солбуйааччы