Руслан Федотов: «Эдэр дьон үтүө үгэһи салгыах тустаахтар»
Ил Түмэн дьокутаата Руслан Федотов Саха сирин олохтоохторун 1 Маай бырааһынньыгынан эҕэрдэлиир:
— Ытыктабыллаах Саха сирин олохтоохторо! Тус бэйэм ааппыттан эһигини Ыам ыйын 1 күнүнэн – Үлэ уонна Күөх Маай бырааһынньыгынан ис сүрэхпиттэн эҕэрдэлиибин!
Хас биирдии Саха сирин олохтооҕор бу бырааһынньык дириҥ суолталаах, үөрүүлээх күн. Саха дьоно былыр да, быйыл да үлэни өрө тутан, норуот хаһаайыстыбатын бары салааларыгар кэккэ ситиһиилэрдээх. Үйэлэр тухары аҕа көлүөнэ дьоммут үлэҕэ-хамнаска үтүө үгэһи олохтообуттара. Кинилэр ортолоругар өрөспүүбүлүкэ экэниэмикэтин төрүтүн олохтоспут, тус холобурдарынан үтүө суобастаахтык үлэлииргэ үөрэппит, «Үлэ бэтэрээнэ» бочуоттаах ааты киэн тутта сүгэр дьон аҕыйаҕа суох. Эдэр көлүөнэ үлэһит дьон ол үтүө үгэһи салгыах тустаах.
Ыам ыйын 1 күнүн Саха сирэ кыахтаах, ситиһиилээх эрэгийиэн быһыытынан көрсөр. Биһиги өрөспүүбүлүкэбит сүрүн баайа – киһи! Эһиги күүрээннээх үлэҕитинэн, кыайыыга көҕүлүүр дьулуургутунан өрөспүүбүлүкэ социальнай-экэнэмиичэскэй сайдыытыгар үтүө түмүктэри ситиһэҕит, бигэ олоҕу түстүүгүт.
Өрөспүүбүлүкэ олохтоохторо тутууга, энергетикэҕэ, доруобуйа харыстабылыгар, бырамыысыланнаска, тыа хаһаайыстыбатыгар, култуура уонна үөрэх эйгэлэригэр үтүө түмүктэри ситистилэр. Маннык таһаарыылаах үлэнэн биһиги инники кэскилбитин түстүүбүт. Оҕолорбут, сиэннэрбит олохторун уйгута хас биирдиибит илиибит эрчимиттэн, билиибититтэн-көрүүбүтүттэн, үлэҕэ дьоҕурбутуттан быһаччы тутулуктаах. Бу кыахпытын ыһыктыбакка, инники кэскилбит туһугар үлэни өрө тутан иллээхтик, эйэлээхтик олоруоҕуҥ!
Күндү доҕоттор! Маай бырааһынньыгынан эһиэхэ уҕараабат эрчими, чэгиэн-чэбдик буолууну баҕарабын. Барыгытын үтүө санаа уонна дьол-соргу арыаллаатын!
edersaas.ru