Дьокуускайга иһитиннэрэр-биллэрэр маассабай сириэстибэлэр омуктар икки ардыларынааҕы уонна этноконфессиональнай сыһыаннаһыыны сырдатыыга Бүтүн Арассыыйатааҕы “СМИротворец – 2017” куонкурустара түмүктэннэ.

edersaas.ru

Бу куонкурус омуктар дьыалаларыгар федеральнай агентство уонна этностар икки ардыларынааҕы сыһыаннаһыыга идэтийэр суруналыыстар гильдияларын тэрээһининэн 2008 сыллаахтан федеральнай уокуруктарынан ыытыллар. Жюрига толоруулаах былаас федеральнай уорганнарын, национальнай-култуурунай уопсастыбаннай холбоһуктар, суруналыыстар сойуустарын, иһитиннэрэр-биллэрэр сириэстибэлэр бэрэстэбиитэллэрэ итиэннэ этнолог-учуонайдар үлэлииллэр. Уһук Илин федеральнай уокурук регионнарын суруналыыстара барыта 744 үлэни киллэрбиттэр. Ол түмүгэ бэҕэһээ Дьокуускайга таһаарылынна.

Кыайыылаахтарга наҕараадалары өрөспүүбүлүкэ Баһылыгын уонна Бырабыыталыстыбатын дьаһалтатын салайааччы Федор Борисов туттарда. «Телевидение» номинацияҕа Айна Винокурова («Саха» СТРХ), «Интернет» номинацияҕа Саха иһитиннэрэр агентствотын суруналыыһа Галина Мозолевская «Большая земля» бырайыага («Сахамедиахолдинг» АУо) кыайыылааҕынан ааттаннылар. Бэчээт уорганнарыгар бастыҥынан «Камчатское время» хаһыат (Камчаткатааҕы Петропавловскай) буолла, «Этнотуризм» номинацияҕа Екатерина Карпухина уонна Дьулустаан Трофимов («Сулус Медиа», Дьокуускай) «Отмороженные» бырыайыктара тэҥнээҕин булбата.

Федор Борисов өрөспүүбүлүкэ салалтатын аатыттан кыайыылаахтары истиҥник эҕэрдэлээтэ итиэннэ дойду инники сайдыыта биир дьиэ кэргэн курдук иллээхтик олорор омуктар духуобунастарын, култуураларын саҥалыы сайыннарыыттан тутулуктааҕын бэлиэтээтэ, суруналыыстар айар үлэлэригэр өссө үрдүк ситиһиилэри баҕарда.

Галина Мозолевская, «Интернет» номинация кыайыылааҕа, «Большая земля» бырайыак ааптара:

— Маннык улахан күрэхтэһиигэ биһиги бырайыакпыт бастаабытыттан олус соһуйдубут уонна үөрдүбүт. Быйыл саҕаламмыт итиэннэ өрөспүүбүлүкэ сүүс сыллаах үбүлүөйүгэр, ол эбэтэр 2022 с. түмүктэниэхтээх «Большая земля» бырайыакка биһиги сүүс тэттик лоскуйдарынан өрөспүүбүлүкэ олоҕун-дьаһаҕын сырдатан көрдөрөбүт.

Раиса Сибирякова, “Саха сирэ” хаһыат, edersaas.ru 

Хаартыскалар СИА сайтыттан ылылыннылар.