Федерация Сэбиэтигэр Саха сирин күннэрэ ыытыллыахтара

Бөлөххө киир:

Эһиил кулун тутар ыйга, Саха АССР төрүттэммитэ 100 сылын туоларыгар, Москваҕа Федеральнай Мунньахха Саха сирин күннэрэ ыытыллыахтара.

Алтынньы 21 күнүгэр Ил Дархан Айсен Николаев норуот дьокутааттара кыттыылаах бырабыыталыстыба мунньаҕар бу тэрээһин туһунан сиһилии билистэ.

Саха сирин күннэрэ парламент икки балаататыгар ыытыллыахтара, сүрүн тэрээһиннэр Федерация Сэбиэтигэр буолуохтара. “Создаем будущее, сохраняя традиции” быыстапка тэриллиэҕэ. Онно көрүдүөр устун баран иһэн, өрөспүүбүлүкэ сүрүн ситиһиилэрин, норуоттар култуурадарын, историяларын билсиэхтэрэ. Оттон Судаарыстыбаннай Дуумаҕа Саха сирин туһунан роликтар көстө туруохтара.

Айсен Николаев бу тэрээһин улахан суолталааҕын бэлиэтээтэ. Быыстапка элбэҕи көрдөрөр, быһаарар буолуохтааҕын, ол эрээри сүрүн болҕомтону Федерация Сэбиэтин пленарнай мунньаҕар уурарга эттэ. Пленарнай мунньах түмүгүнэн парламент үрдүкү балаатата өрөспүүбүлүкэ социальнай-экэнэмиичэскэй сайдыытыгар судаарыстыбаннай көмө туһунан уурааҕы ылыныахтаах. Бу бырайыакка федеральнай көмөнү эрэйэр суһал боппуруостар, холобур, социальнай, инфраструктурнай эбийиэктэри тутуу киириэхтэрэ.

Санатар буоллахха, Саха АССР төрүттэммитэ 100 сылын бэлиэтиир туһунан укааска бэрэсидьиэн Владимир Путин илии баттаабыта. Сүрүн тэрээһиннэр былааннара бигэргэммитэ, онно федеральнай уонна эрэгийиэннээҕи бүддьүөттэртэн үп көрүллэр. Ону тэҥэ, баҕалаахтар үп угар пуондалара үлэлиир.

Үбүлүөйү көрсө элбэх үлэ ыытыллар: архитектура пааматынньыктара өрөмүөннэнэллэр, социальнай суолталаах тутуулар ыытыллаллар, култуура, наука тэрээһиннэрэ, араас аахсыйалар буолаллар.

Ангелина Васильева, “Саха сирэ” хаһыат, edersaas.ru

Хаартыска: СИА.

+1
0
+1
0
+1
0
+1
0
+1
0
+1
0
+1
0