Бүгүҥҥүттэн Москваҕа Федерация Сэбиэтигэр Саха сирин күннэрэ саҕаланнылар. Бу күннэргэ Ил Дархан Егор Борисов, Ил Түмэн бэрэссэдээтэлэ Александр Жирков уонна дьокутааттар араас тэрээһиҥҥэ кыттыахтара.
Бүгүн Федерация Сэбиэтин бүддьүөкка уонна үп ырыынагар кэмитиэтин киэҥ ыҥырыылаах мунньаҕар Саха Өрөспүүбүлүкэтин холобуругар нолуок сокуоннарын тупсарыы боппуруостарын көрдүлэр. Сарсын тустаах кэмитиэттэргэ Арктика инники кэскилин, Саха сирин инфраструктуратын сайыннарыы, баар сокуоннары тупсарыы, тыа хаһаайыстыбатын сайдыытын, айылҕа баайын табыгастаахтык туһаныы туһунан кэпсэтиэхтэрэ. Ону сэргэ социальнай эйгэҕэ, үөрэххэ, наукаҕа, экономикаҕа туспа боппуруостар көрүллүөхтэрэ.
Ил Түмэн дьокутааттара, СӨ Конституционнай суутун бэрэстэбиитэллэрэ, Бырабыыталыстыба чилиэннэрэ конституционнай сокуоннарга уонна судаарыстыбаннай тутулга кэмитиэт төгүрүк остуолугар кыттыахтара.
Ахсынньы 15 күнүгэр Ил Дархан Егор Борисов, Ил Түмэн бэрэссэдээтэлэ Александр Жирков Федерация Сэбиэтин бэрэссэдээтэлэ Валентина Матвиенконы уонна сенатордар Александр Акимовы, Вячеслав Штырову кытары көрсүөхтэрэ. Ону таһынан бу күн Федерация Сэбиэтин пленарнай мунньаҕар «Россия Федерациятын субъегын чааһа» буолуоҕа. Манна спикер Александр Жирков өрөспүүбүлүкэ социальнай-экономическай сайдыытын сокуонунан хааччыйыы тирээн турар кыһалҕаларын туһунан дакылааты оҥоруоҕа.
Аграфена КУЗЬМИНА, “Саха сирэ” хаһыат, edersaas.ru.