Бэлиитикэ Тыа хаһаайыстыбата

Федерация Сэбиэтэ «Уһук Илиҥҥи гектары» кэҥэтэр туһунан сокуон бырайыагын өйөөтө

Федерация Сэбиэтэ 2016 сылтан үлэлиир «Уһук Илиҥҥи гектар» бырагыраамата Арктика территориятыгар эмиэ үлэлиирин туһунан сокуон бырайыагын өйөөтө.

edersaas.ru

Маны таһынан бу сокуон чэрчитинэн ылбыт сирдэрин көдьүүстээхтик туһанар киһи эбии «гектары» ыларыгар кыах бэрилиннэ. Биэс хонук иһинэн сокуон бырайыага Арассыыйа Бэрэсидьиэнигэр илии баттааһыҥҥа ыытыллыаҕа диэн Уһук Илини сайыннарыы министиэристибэтин пресс-сулууспата иһитиннэрэр.

Арассыыйа хас биирдии олохтооҕо онлайн эрэсииминэн картаҕа бэйэтэ талан, Уһук Илиҥҥэ биир гектар сири ылыан сөп. Бу бырагыраама олоххо киириэҕиттэн 93 тыһ. киһи сир ылан, үлэ-хамнас тэриннэ. Билигин бырагырааманы кэҥэтиигэ үлэ барар: таһаарыылаахтык үлэлиир киһи эбии сири ылар кыахтанна, ону таһынан бырагыраама Арктика сиригэр-уотугар эмиэ үлэлиэҕэ, – диир Арассыыйа Федерациятын Бырабыыталыстыбатын бэрэссэдээтэлин солбуйааччы, Уһук Илиннээҕи федеральнай уокурукка Бэрэсидьиэн боломуочуйалаах бэрэстэбиитэлэ Юрий Трутнев.

Онон атырдьах ыйын 1 күнүттэн саҕалаан бу бырагырааманан ылбыт сирдэрин көдьүүстээхтик туһанар дьон эбии «гектары» ылар кыахтаныахтара. Даҕатан эттэххэ, бу сокуон бырайыага фермердэр уонна урбаанньыттар киллэрбит этиилэригэр олоҕуран оҥоһулунна. Ону таһынан, Арассыыйа Арктикатааҕы зонатыгар (Мурманскай уобаласка, Ненец автономнай уокуругар, Ямал-Ненец автономнай уокуругар уонна Красноярскай кыраай, Архангельскай уобалас, Коми өрөспүүбүлүкэтин, Карелия 23 муниципальнай оройуоннарыгар) гектар сокуона үлэлиэҕэ. Билигин олохтоох былаастар бэриллэр сир учаастагын быһаара сылдьаллар.

Раиса Сибирякова, «Саха сирэ» edersaas.ru

0
0