Федеральнай министиэристибэ салалтата саха ыччатыгар болҕомтотун уурда
Аныгы IT-технология күннээҕи олохпутугар күүскэ өтөн киирбит үйэтигэр дойдубут инники кэскилин ыччат тутуоҕа. Кинилэр «InDriver» курдук саҥа мобильнай сыһыарыыны, аан дойду үрдүнэн атыыланар көмпүүтэр оонньуутун, дьиэ сууйар роботы о.д.а. айан таһааран, Сахабыт сирин албан аатын Арассыыйаҕа эрэ буолбакка, омук сиригэр эмиэ аатырдаллар.
edersaas.ru
Маны болҕомтоҕо ылан, РФ Тутууга уонна ОДьКХ миниистирин солбуйааччы Максим Егоров Дьокуускайга буола турар «Өйдөөх куорат – олорорго табыгастаах эйгэ» диэн Уһук Илин таһымыгар икки күннээх форум чэрчитинэн, IT-пааркаҕа ыччаты кытта көрүстэ.
Александра Улинова, Ньурбаҕа уопсастыбаннай эйгэни сайыннарар дириэксийэни салайааччы кыра нэһилиэнньэлээх куоракка олохтоохтор көмөлөрүнэн пааркаҕа аарка оҥорбуттарын, ону лаампа уотунан сырдаппыттарын туһунан кэпсээтэ.
«Туох даҕаны тэрээһин буолбатын үрдүнэн, көннөрү муусука, уот-күөс холбоотоххо, пааркабытыгар хас киэһэ аайы дьон сөбүлээн мустар идэлэннэ. Салгыы хатыҥ чараҥнаах Бүлүү эбэ биэрэгин, Нюрбинка үрэх кытылын дьон сынньанарыгар аныгы олох ирдэбилинэн табыгастаах гына оҥоруохпутун баҕарабыт.
Итинник дьон пааркаттан үөһээ тахсан, өрүс кытылын устун дьаарбайан, үрэҕи кыйа эргийэн кэлиэхтэрэ, оччотугар улахан төгүрүмтэ оҥоһуллан, сынньалаҥ эйгэтэ кэҥээн, тупсан, киэркэйэн иһиэ. Бастакы хардыыбытын бүддьүөттэн харчы көрдөөбөккө, төрөөбүт түөлбэбитин дьон олороругар табыгастаах оҥорорго улахан баҕалаах, көхтөөх дьону түмэ тардан, кинилэр көмөлөрүнэн пааркабытын киэргэттибит. Ньурбабыт силигин ситэрэргэ элбэх киһи кыттыһарыттан үөрэбит», — диэн билиһиннэрдэ кини.
Федеральнай министиэристибэ салалтатын кытта көрсүһүүгэ өрөспүүбүлүкэ ыччата сонун бырайыактарын билиһиннэрдэ, холобур, сүппүт малы булар саҥа IT-бородууксуйаларын сырдаттылар. Уопсастыбаннай эйгэ тутуллан, куорат тас көстүүтэ киэркэйэрин туһугар бүддьүөттэн син биир өйөбүл баара наадатын эдэр архитектордар туруорустулар.
Марианна Тыртыкова, «Саха сирэ», edersaas.ru