Федеральнай миниистир Александр Козлов: Саха сиригэр ойуур баһаарын сезона холкутук ааһан эрэр

Ааптар: 
Бөлөххө киир:

Бэҕэһээ, от ыйын 25 күнүгэр, РФ Бэрэсидьиэнэ Владимир Путин РФ Бырабыыталыстыбатын тутаах министиэристибэлэрин салайааччыларын кытта мунньахтыырыгар дойду үрдүнэн ойуур баһаарын балаһыанньата эмиэ таарыйылынна. 

Ойуур баһаардарын боппуруоһугар сүрүн дакылааты РФ айылҕа ресурсаларыгар уонна экологияҕа миниистирэ Александр Козлов оҥордо. Кини чуолаан дойду үрдүнэн ойуур баһаардарын балаһыанньатын кэпсээтэ. Федеральнай миниистир сүрүн дакылааты оҥорбутун кэнниттэн  Владимир Путин тута: «Саха сиригэр уонна Хабаровскай кыраайга ойуур баһаардарын утары охсуһуу түмүктэрэ билигин хайдаҕый?», — диэн ыйытыыга Александр Козлов: «Саха сиригэр уонна Хабаровскай кыраайга от ыйын 19 күнүгэр эрэ федеральнай таһымнаах ыксаллаах быһыы-майгы эрэсиимэ биллэриллибитэ. Хабаровскайы чуолкайдыыр буоллахха, ыраах сытар оройуоннарга ойуур баһаара умайар. Хабаровскайтан хоту диэки 1700 км ыраах сиргэ бааллар. Итиннэ умайар баһаардары ССРС да кэмигэр умуруорбаттара. Ыксаллаах быһыы-майгы эрэсиимэ биллэриллэн,  Айян, Нелькан уонна Чумикан  муниципальнай оройуоннарыгар резервэҕэ сылдьар авиационнай уматыгы Ми-8 бөртөлүөттэри сапыраапкалыырга туһанныбыт. Кэлэр өттүгэр ити этиллибит оройуоннарга уматыгы эрдэ илдьэргэ быһаарынныбыт. Билигин ити оройуоннарга уматык саппааһа аҕыйах. Эрэгийиэннээҕи баһаары умулларар бөлөх кэккэтэ 100 киһинэн эбилиннэ. Итинэн сиэттэрэн, Джигда диэн нэһилиэги уоттан көмүскээтибит.

Оттон Саха сиригэр балаһыанньа хайдаҕый? Федеральнай резерветтэн эбии 279 парашютист-десантнигы, 14 салгын аалын уонна 29 тиэхиньикэни көмөҕө ыыппыппыт.  Уопсайынан, быйыл Саха сиригэр ойуур баһаарын сезона холкутук ааһан эрэр. Эрэгийиэҥҥэ  ойуур баһаарын сэрэтиигэ, умуруорууга үбү көрүү 5,6 төгүл улаатара ситиһилиннэ. Ол түмүгэр, салгын аалларынан кэтээн көрүү чааһа лаппа улаатта — 5 тыһ. диэри. Сиринэн хонтуруоллааһын иэнэ үс тыһ. км кэҥээтэ. Ойуур баһаарын умулларыыга үлэлиир дьон ахсаана 564 киһиэхэ диэри улаатта, ону тэҥэ, парашютист-десаннар ахсааннара 555-кэ тиийдэ. Ону тэҥэ, ойуур баһаара элбэхтик турар улуустарга авиационнай отделениелар тэрилиннилэр», — диэн быйылгы ойуур баһаардарын уодьаганныырга туох-ханнык сөптөөх үлэлэр ыытыллыбыттарын саас-сааһынан чуолкайдык быһааран биэрдэ.  Эрдэттэн сөптөөх үлэ ыытыллыбытын түмүгэр, тустаах балаһыанньа этэҥҥэ.  Былырыын баччаларга 150-ча кэриҥэ ойуур баһаара Саха сирин күөх дуолун күл-көмөр оҥороро.

Хаартыска — Галина Мозолевская.

+1
0
+1
0
+1
0
+1
0
+1
0
+1
0
+1
0