Доруобуйа

Федеральнай быраастар ыйы быһа үлэлээтилэр

Саха сиригэр Федеральнай мэдиссиинискэй-биологическай ааҕыныстыба Сибиирдээҕи научнай-килиниичэскэй киинин быраастарын хомуур этэрээтэ Красноярскайтан кэлэн, биир ыйы быһа үлэлээн бардылар. Ол түмүгэр ФМБА научнай киинэ уонна СӨ доруобуйа харыстабылын министиэристибэтэ бииргэ үлэлэһэргэ илии баттастылар.

Миэдиктэр сүрүннээн Дьокуускайга уонна Мииринэйгэ ковидтаах ыарыһахтар сытар балыыһаларыгар реанимацияҕа киирэн, бэриниилээхтик үлэлээтилэр. Манна бастыҥ анестезиологтар, реаниматологтар кэлэн үлэлээн, олохтоох быраастарга уопуттарын үллэһиннилэр.

Маны тэҥэ, сайыны быһа ойуур баһаардарын утары үлэлээбит дьон, волонтердар доруобуйаларын бэрэбиэркэлээтилэр. Горнай улууһун Бэс Күөлүгэр уонна Дьокуускайга барыта 500-тэн тахса киһини көрдүлэр-иһиттилэр. Невролог, офтальмолог, терапевт, кардиолог, эндокринолог, пульмонолог, офтальмолог, оториноларинголог, хирург быраастар баһаар киһи доруобуйатыгар туох содуллааҕын бэрэбиэркэлээтилэр. Холобур, Бэс Күөлүгэр 75 киһиэхэ аан бастаан диабеты, хаан баттааһына үрдээһинин, харах, тыынар уорган ыарыыларын булан, салгыы эмтэнэргэ ыыттылар.

Доруобуйа харыстабылын миниистирэ Елена Борисова эппитинэн, бииргэ үлэлэһии араас ыарыылары эмтииргэ, сэрэтэргэ, сүбэлэлэһэргэ, үлэ уопутун атастаһарга, эдэр исписэлиистэри, терапевтары үөрэтэргэ, о.д.а. туһалаах буолуоҕа. Манна видеокэмпириэнсийэ көрүҥүн киэҥник туһаныахтара.

ФМБА миэдиктэрэ ыксаллаах быһыы-майгы үөскээтэҕинэ, араас эрэгийиэннэргэ баран үлэлиир буолан, улахан уопуттаахтар. Холобур, манна кэлиэхтэрин иннинэ, атырдьах ыйыгар Братскай куоракка, Симферопольга, Иркутскай уобалаһыгар үлэлээбиттэрэ.

ФМБА мэдиссиинискэй этэрээтэ СӨ бырабыыталыстыбатын ыҥырыытынан, федеральнай ааҕыныстыба салайааччыта Вероника Скворцова сорудаҕынан кэлэн, улахан үлэни оҥорон бардылар. Саха сиригэр сылаастык көрсүбүттэрин, үлэлииргэ, олорорго, күүстээх үлэ кэннэ сынньанарга үчүгэй усулуобуйаны оҥорбуттарын бэлиэтээтилэр.

Бырабыыталыстыба бэрссэдээтэлин бастакы солбуйааччы Дмитрий Бердников кинилэр үлэлэрин сыаналаан, Ил Дархан, Ил Түмэн Махтал суруктарын туттартаата.

Анестезиолог-реаниматолог Владимир Гришаев:

— Дойду үрдүнэн эпидемиологическай балаһыанньа уустук. Онон бары бииргэ буоллахпытына эрэ, уодаһыннаах ыарыыны кыайыахпыт. Биһиги кыахпыт баарынан көмөлөһө сатаатыбыт. Отделение кэлэктиибэ биһигини кытары биир хамаанда буолан, өйдөһөн үлэлээтибит. Наада буоллаҕына, көмөлөһөр илиилэрин уунан, көхтөөхтөрүн, түмсүүлээхтэрин көрдөрбүттэрэ, олус сылаастык көрсүбүттэрэ, онон махталбытын тиэрдэбит, — диэн этэр.

Ангелина Васильева, «Саха сирэ» хаһыат, edersaas.ru

Хаартыска: СИА.

0
0