Сабыллыбыт бөһүөлэктэртэн көһөрөргө федеральнай бүддьүөттэн 288 мөлүйүөн 185 тыһыынча солкуобай көрүллүөҕэ. РФ бырабыыталыстыбатын бэрэссэдээтэлэ Михаил Мишустин ол туһунан ыйаах таһаарда.
Уһук Илиҥҥэ уонна онуоха тэҥнэһэр сирдэргэ сабыллыбыт нэһилиэнньэлээх пууннартан кыайан көспөккө хаалбыт дьоҥҥо 112 дьиэ-уот сэртипикээтэ бэриллиэҕэ. Судаарыстыба маннык көмөтүн кинилэр 2002-2012 сылларга ылыахтарын сөп этэ да, сорохтор туһаммакка хаалбыттара. Билигин дьиэ-уот сэртипикээтин ылар кыах эмиэ үөскээтэ.
Саха сириттэн ураты, Коми Өрөспүүбүлүкэтигэр, Магадан уобалаһыгар уонна Чукоткаҕа маннык көмөнү көрдүлэр. Онон федеральнай бүддьүөттэн барыта 489,3 мөлүйүөн солкуобай суумалаах 219 дьиэ-уот сэртипикээтэ бэриллиэхтээх. Көстөрүн курдук, саамай элбэх сэртипикээти Саха сиригэр биэрбиттэр.
Сайабылыанньалары 2020 сыл ахсынньы 1 күнүгэр диэри туталлар.
Ангелина Васильева, “Саха сирэ” хаһыат, edersaas.ru