Доруобуйа харыстабылын министиэристибэтэ иһитиннэрбитинэн, Россияҕа коронавируһу эмтиир эмп оҥоһуллан, судаарыстыбаннай эмп-том реестригэр киллэриллибит.
edersaas.ru
Эмтиир препарат «Авифавир» диэн эргиэн аатынан биллэр, оттон аан дойдутааҕы патена суох туһаныллар аата «Фавипиравир» диэн буолар. Эмп оҥоруутунан «ХимРар» холбоһуктаах хампаанньа дьарыктаныаҕа.
«Авифавир» маҥнайгы анала грипп утары охсуһар. Бу эми коронавирус утары туһанарга тургутууну Доруобуйа харыстабылын министиэристибэтэ муус устар бүтүүтэ көҥүллээбитэ. Эмп дьайыытын тургутарга дойду 17 балыыһатыгар COVID-19 ыарыыттан эмтэнэ сытар дьон туттубуттара.
Ыам ыйын 6 күнүгэр Доруобуйа харыстабылын министиэристибэтин салайааччыта Михаил Мурашко “эмп эрэннэрэр көрдөрүүлээх” диэн биллэрбитэ.
«Фавипиравиры” атын дойдуларга эмиэ тургутан көрө сылдьаллар. Олунньуга Кытай Zhejiang Hisun Pharmaceutical эмтиир хампаанньата бу эми кытта үлэни саҕалаабыта. Японияҕа эмп үлэлиирин туһунан ыам ыйыгар быһаарыы таһаарыахтаах этилэр эрээри, “хамыыһыйа сыана быһар өссө эрдэ” диэн быһааран тургутууну өссө уһаппыттар.
Егор Карпов, «Саха сирэ» хаһыат, edersaas.ru