СӨ Доруобуйа харыстабылыгар министиэристибэтэ аныгылыы фельдшерскэй-акушерскай пууннары уонна амбулаториялары тутууга систиэмэлээх үлэни ыытар. Бу туһунан биэдэмистибэ пресс-сулууспата иһитиннэрэр.
«Доруобуйа харыстабыла» национальнай бырайыак чэрчитинэн фельдшерскэй-акушерскай пууннар, бастатан туран, оройуон кииниттэн тэйиччи баар, эрдэ мэдиссиинискэй көмөнү оҥорор анаан тэрилтэтэ суох нэһилиэнньэлээх пууннарга арыллаллар.
Быйыл былааннаммыт 18 пуунтан номнуо аҕыһа үлэҕэ киирбитэ. Бу Эдьигээн Баахынай, Үөһээ Бүлүү Тамалакаан, Томпо Охотскай Перевоз, Усуйаана Дьүкээгир, Орто Халыма Березовка, Сунтаар Толоон уонна Таатта Боробул нэһилиэктэригэр арыллыбыттара.
Сыл бүтүөр диэри Хаҥаласка, Ньурбаҕа, Булуҥҥа, Чурапчыга, Уус Алдаҥҥа, Аммаҕа, Бүлүүгэ, Мэҥэ Хаҥаласка, Намҥа уонна Дьокуускай Эргэ Табаҕатыгар арыллыахтара.
«2019 сылтан өрөспүүбүлүкэҕэ 18 ФАП үлэҕэ киирдэ: аҕыс — бу сылга, уон — ааспыт сылга», — диэн миниистир Елена Борисова этэр.
Хас биирдии ФАП мэдиссиинискэй оборудованиенан уонна миэбэлинэн хааччыллар. Маныаха фельдшерскэй, процедурнай, смотровой кабинеттар баар буолуохтара.
edersaas.ru