«Саха» НКИХ ханаалыгар “Фактор Z” биэриигэ Дмитрий Аргунов эрэгийиэннээҕи ДОСААФ уопсастыба бэрэссэдээтэлин Сергей Соболевы кытта сэһэргэстэ.
Сергей Владимирович бу түмсүү бүгүҥҥү күннээҕи түбүктэрин, кыһалҕаларын туһунан кэпсээтэ:
— ДОСААФ туох тыллартан турар кылгатыы буоларын дьон үксэ билигин билбэттэр. Өйдөтөн эттэххэ, “Добровольное общество содействия армии, авиации и флоту России” диэн суолталаах. Биһиги уопсастыбабыт олус уһун устуоруйалаах, улахан өҥөлөрдөөх түмсүү буолар. Биһиги испититтэн Покрышкин, Гагарин кынаттаммыттара. Аҕа дойду иннинэ “Ворошиловский стрелок” хамсааһын үгүс сэбиэскэй дьону кыраҕытык ытарга үөрэтэн, кыайыыны уһансыыга көмө буолбута. Оттон билигин, бэҕэһээ тэриллибит кэммиэрчэскэйэ суох түмсүүлэри кытта биир тэҥ статустаахпыт. Бэйэбитин үбүлэнэн үлэлиир буоламмыт, сорох дьон хараҕар массыынаны ыытарга быраабы ыларга үөрэх биэрэр оскуола курдук көстөбүт”.
Дмитрий Аргунов билиҥҥи ДОСААФ кими, туохха бэлэмниэн сөбүн туоһуласта, хайдах урукку кэм курдук байыаннай дьарыгы сөргүтүү кыаллыан сөбүн-суоҕун ырытыста. Билигин Саха сиригэр парашютунан ыстаныыга бэлэмнээһин суоҕун соһуйа иһиттэ.
— Кырдьык, билигин парашютунан ыстаныыга бэлэмнээбэппит. Биричиинэтэ судургу – сөмөлүөттэрбит гарантийнай көрүүнү-истиини ааһа иликтэр. Биэс сыл буола-буола сөмөлүөт көрүүнү ааһара ирдэнэр, онно 12 мөлүйүөн бараныахтаах. Ити туораттан үбүлээһинэ суох кыаллыбат дьыала, – диэн кэпсиир ДОСААФ бэрэссэдээтэлэ.
Биллэн турар, Украинаҕа буола турар байыаннай эпэрээссийэ тиэмэтин таарыйан аастылар. ДОСААФ билигин иккис добровлецтар батальоннарын таҥа сылдьар эбит. “Сэриигэ даҕаны, атын даҕаны ыксаллаах түгэннэргэ анал үөрэхтээх киһи өр тыынаах хаалар, онон ДОСААФ дьону бэйэни быыһанарга үөрэтэр”, — диэн этэр Сергей Соболев.