Убайааҥҥа баар көтөрү иитэр фабрика – Ньурба улууһугар биир улахан суолталаах эбийиэк. Санатан эттэххэ, быйыл саас манна 45 тыһыынча куурусса турбут килиэккэтэ сууллан түспүтэ.
edersaas.ru
Саахал кэнниттэн суһал мунньах ыытыллан, 49,6 тыh. көтөр турар, 20 мөл. солк. суумалаах «Биг Дайчмонд» фирма оборудованиетын аҕалан туруорарга быһаарыллыбыта. Онуоха диэри үлэ тиһигин быспат итиэннэ сыахтары өрөмүөннүүр, чөлүгэр түһэрэр сорук турбута. Инньэ гынан, нэһилиэнньэ сымыытынан хааччыллыытын быспат инниттэн, 12 тыһ. куурусса атыыламмыта.
Саҥа технология Ньурбаҕа балаҕан ыйын 20 күнү эргин аҕалыллар буолбут. Атырдьах ыйын 23 күнүнээҕи туругунан, туттарааччыга 19,5 мөл. солк. төлөммүт (уопсай ороскуот 88 %-а).
Тыа хаhаайыстыбатын миниистирин э.т. Александр Атласов ааспыт нэдиэлэҕэ Бүлүү умнаһынааҕы улуустарга тиийэ сылдьан, Ньурба улууһун салалтатын кытары көрүстэ, фабрикаҕа ыытыллар үлэни-хамнаһы билистэ. Атырдьах ыйын 10 күнүнээҕи бирикээһинэн, ылыллыбыт оборудование сыанатын 80 %-ын судаарыстыба суотугар төннөрүү бэрээдэгэ тахсыбытын, ол бирикээс Гражданскай уопсастыба институтун сайдыытын министиэристибэтигэр регистрацияҕа сытарын туһунан эттэ.
Екатерина Захарова, edersaas.ru сайтка анаан.