Муус устар 30 – ыам ыйын 6 күннэригэр Каспийскай куорат Али Алиев аатынан Спорт дыбарыаһыгар тустууга Европа чөмпүйэнээтэ буолар. Көҥүл тустууга хапсыһыылар ыам ыйын 4 күнүттэн саҕаланыахтара.
Бу улахан түһүлгэҕэ кыттар Арассыыйа сүүмэрдэммит хамаандатыгар сүрүннээн “Иван Ярыгин” Гран-при (Красноярскай), «Дан Колов и Никола Петров» (София, Болгария) норуоттар икки ардыларынааҕы турнирдар кыайыылаахтара киирдилэр. Хамаанда сүрүн тириэньэрэ Дзамболат Тедеев Билял Маховка улаханнык эрэммитэ эрээри, аан дойду үс төгүллээх чөмпүйүөнэ, 2012 сыллааҕы Олимпийскай оонньуулар призердара эпэрээссийэ кэнниттэн кыайан чөлүгэр түспэтэ.
Онон Европа чөмпүйэнээтигэр кыттар Арассыыйа сүүмэрдэммит хамаандатын састааба маннык буолла:
57 кг диэри — Заур Угуев, Европа-2017 призера
61 кг диэри — Гаджимурад Рашидов, Европа-2016 чөмпүйүөнэ
65 кг диэри — Ильяс Бекбулатов, Европа-2017 чөмпүйүөнэ
70 кг диэри — Магомед Курбаналиев, аан дойду -2016, Европы-2013 чөмпүйүөнэ.
74 кг диэри — Хетик Цаболов – аан дойду-2014 чөмпүйүөнэ
79 кг диэри — Ахмед Гаджимагомедов – Европа- 2017 призера
86 кг диэри — Артур Найфонов
92 кг диэри — Абдулрашид Садулаев — олимпийскай чөмпүйүөн (2016), аан дойду икки төгүллээх чөмпүйүөнэ (2014, 2015), Европа икки төгүллээх чөмпүйүөнэ (2014, 2015).
97 кг диэри — Владислав Байцаев — Европа-2011, 2013 призердара
125 кг диэри — Мурадин Кушхов
Роман Попов, “Саха сирэ” хаһыат, edersaas.ru