Европаҕа сыл бастыҥ футболиһынан ким буолуой — Модрич, Роналду биитэр Салах?

Атырдьах ыйын 30 күнүгэр Монакоҕа УЕФА (Европа футболга ассоциацияларын сойууһа) Чөмпүйүөннэр лигаларын бөлөхтөрүнэн түһүмэҕэр сэрэбиэйдэһиини ыытар анал биэчэригэр сыл бастыҥ футболиһын аата биллиэҕэ.

Ааспыт сезон бастыҥ футболиһын аатын быһаарар УЕФА шорт-лииһигэр “Реал” (Мадрид) полузащитнига Лука Модрич (Хорватия), бу сайын “Реалтан” Италия “Ювентуһугар” көспүт Криштиану Роналду, итиннэ Англия “Ливерпуль” хамаандатын нападающайа Мохамед Салах (Египет) киирдилэр.

Манна Антуан Гризманн («Атлетико» Мадрид), Лионель Месси («Барселона»), Килиан Мбаппе («Пари Сен-Жермен»), Кевин де Брейне («Манчестер Сити»), Рафаэль Варан («Реал» Мадрид), Эден Азар («Челси») уонна Серхио Рамос («Реал» Мадрид) кыайан ааспатылар.

Дьахтар футболугар бастыҥ оонньооччу аатыгар сорунааччыларынан Данияттан Пернилла Хардер («Вольфсбург»), Норвегияттан Ада Хегерберг («Лион») уонна Францияттан Амандин Анри («Лион») буолаллар.

Модрич уонна Роналду ааспыт сезоҥҥа Чөмпүйүөннэр лигаларын Кубогын ылбыт “Реал” састаабыгар оонньообуттара. Модрич маны тэҥэ, быйыл Арассыыйаҕа ыытыллыбыт аан дойду чөмпүйэнээтин үрүҥ көмүс мэтээлин хаһаайынынан буолар. Оттон Роналду Чөмпүйүөннэр лигаларын бастыҥ бомбардирынан сэттис төгүлүн ааттанна. Салах ааспыт сезоҥҥа Англия чөмпүйэнээтигэр саамай элбэх голу киллэрэн саҥа рекорду олохтоон турар.

Бу үс футболист ФИФА сыл бастыҥ футболиһын аатыгар сорунар уон спортсмен иһигэр эмиэ бааллар.

Роман Попов, edersaas.ru

Хаартыска Интэриниэттэн ылылынна.