Евгения Михайлова: «Киллэриллэр уларытыылар Төрүт сокуон силигин ситэрэллэр»
Конституцияҕа киллэриллэр уларытыылар дьон-сэргэ, уопсастыба уонна судаарыстыба бүттүүнүн олоҕун тупсарарга туһуланнылар, биир да уларытыы дойду олоҕор бэрдэ суох сабыдыаллаабыта диэн суох. СИА-ҕа комментарийыгар ХИФУ бэрэсидьиэнэ Евгения Михайлова эттэ.
“Мин уларытыылары билистим, билиҥҥи Конституцияны уонна киллэриллэр уларытыылар таблицаларын тэҥнээн көрдүм. Биһиги балаһыанньабыт тупсар, биир да көннөрүү бэрдэ суох сабыдыаллаабыта көстүбэт. Төрүт сокуон силигэ ситэр. Биһиги дьоһун, тупсаҕай олоххо баҕарабыт эбээт, онон куоластыы барыахтаахпыт”, – диэтэ Евгения Михайлова.
ХИФУ бэрэсидьиэнэ эр киһи уонна дьахтар ыал буолууларын өйдөбүлэ быһаарыллыбыт ыстатыйаҕа тохтоото.
Уларытыыларга олоҕуран, 72 ыст. 1 ж. пуунугар Арассыыйа Федерациятыгар уонна кини субъектарын көрүүлэригэр-истиилэригэр дьиэ кэргэни, ийэ уонна аҕа буолууну, оҕо сааһы харыстааһын, ыал буолуу институтун көмүскээһин киирэллэр. Онуоха дьиэ кэргэҥҥэ оҕолору дьоһун киһи гына иитэн таһаарыы, ону тэҥэ саастарын сиппит оҕолор төрөппүттэрин көрүүлэрэ киирэр. Итиннэ үгэс буолбут төрүт үгэспит бигэргэнэ сылдьар.
“Ыал буолуу туһунан сорохтор киһи быраабын хаарыйар дииллэр, оттон, дьиҥэ, төрүт үгэспитигэр олоҕуран ыал буолуу туһунан этиллэр. Наукаҕа төһө да ыал туһунан быһаарыы суоҕун иһин, сорох быраап докумуоннарыгар ити ыйыллар. Аан дойдуга барытыгар дьиэ кэргэн диэн – социальнай аналлаах эрэ буолбакка, биологическай диэн өйдөбүл баар. Ол иһин ыал буолууну Төрүт сокуон таһымыгар бигэргэтэр сөптөөх”, — диэтэ Евгения Михайлова.
Сахагов саайтыттан
Бэлэмнээтэ Женни СТРЮКОВА
Хаартыска: тустаах саайтан