Усуйаана улууһун оройуоннааҕы сэбиэтин дьокутаата Евгений Рябченко дойду Төрүт Сокуонугар уларытыылары киллэриигэ куоластааһыны устуоруйаҕа дьоһун түгэнинэн ааҕар. Бу уларытыылар олоҕу-дьаһаҕы тупсарыахтара.
“Бары билэргит курдук, араас бэлитиичэскэй күүстэр, ол иһигэр ЛДПР баартыйа уларытыыларга сыһыаннаах үгүс этиилэри киллэрбиттэрэ, итилэр бүтэһиктээх эрэдээксийэтигэр киирбиттэрэ, ол курдук биэнсийэни сыл аайы индексациялааһын уонна нуучча тылын статуһуну туһунан”, — диэн дьокутаат СИА-ҕа эттэ.
Евгений Рябченко маны сэргэ Төрүт Сокуоҥҥа киллэриллэр уларытыылар сокуону оҥорор былаас боломуочуйатын кэҥэтэрин уонна социальнай сайдыыга туһуланан, дьон олоҕун тупсарыыга аналлаахтарын аҕынна. Кини этэринэн, куоластыы кэлэр учаастактарга коронавирус тарҕаныытын бохсууга бары миэрэлэри ылыммыттар. “Биһиги дьокутааттарбыт үлэлэрин, чуолаан, Төрүт Сокуоҥҥа киллэриллэр уларытыылары өйүүбүт. Баартыйа бары чилиэннэрин саҥа Конституцияны өйүүргүтүгэр ыҥырабын”, — диэтэ кини.
Аркадий Васильев, СИА
Бэлэмнээтэ Женни СТРЮКОВА
Хаартыска: тустаах саайтан