Эмп-томп ырыынагын туругун кэтээн көрүү түмүгэ өрөспүүбүлүкэҕэ сүрүннээн эмп-томп өттүнэн хааччыллыы толорутун көрдөрбүт. Ол туһунан кулун тутар 11 күнүгэр дьаҥ тарҕаныытын утары тэриллбит Суһал ыстаап брифинигэр Доруобуйа харыстабылын эйгэтигэр федеральнай кэтээн көрөр уорган салайааччыта Евгений Иннокентьев иһитиннэрдэ.
Тас бэлиитикэ эйгэтигэр буола турар быһылааннар сыанаҕа сабыдыал биэрбиттэр. Ол курдук сорох эмп сыаната кыратык үрдээбит.
«Сүрүн уонна тыын суолталаах эмптэр сыаналара биирдиилээн атыыга ортотунан 2,3% үрдээбит. Бу испииһэккэ киирбэт препараттар сыаналара 2%- нан улааппыт», — диэн Евгений Иннокентьев иһитиннэрдэ.
Евгений Иннокентьев эми үс бөлөххө үллэриллэллэрин туһунан иһитиннэрдэ: 100 солк. диэри, 100-тэн 500 солк. уонна 500 солк. үөһээ сыаналаахтарга. «100-тэн 500 солк. диэри бөлөххө киирэр эмп, төттөрүтүн, сыаната 1-1,5% намтаабыта көстөр», – диэн Росздравнадзор территориальнай уорганын салайааччыта быһаарда.
Маны таһынан Евгений Иннокентьев коронавирустан эмтиир препараттар сөптөөх сапаастара хааччыллыбытын туһунан кэпсээтэ. Арассыыйа уонна Саха Өрөспүүбүлүкэтин Бырабыыталыстыбаларын резервнэй пуондаларыттан көрүллүбүт үбүнэн 440 тыһыынчаттан тахса эмп, ол иһигэр 44 тыһыынчаттан тахса хаа фавипиравир, 229 тыһыынча хаа умифеновир уонна да атын препараттар атыылаһыллыбыттар.
«Саха сирэ» хаһыат, edersaas.ru
Хаартыска sakha.gov.ru