Евгений Григорьевы сокуону дьүүллэһэр бөлөххө бэрэстэбиитэлинэн анаатылар
Тохсунньу 28 күнүгэр «Сибиир уонна Уһук Илиҥҥи куораттар ассоциацияларын» (АСДГ) сэбиэтин мунньаҕар Дьокуускай куорат баһылыга Евгений Григорьев кытынна. Видео-кэмпириэнсийэнэн тэриллибит мунньаҕы Красноярскай куорат баһылыга Сергей Еремен бэрэссэдээтэллээн ыытта.
edersaas.ru
Дьокуускай куорат уокуруктааҕы дьаһалтата иһитиннэрбитинэн, «Кыыллары кытта эппиэтинэстээх сыһыан туһунан» ФЗ-498 сокуону олоххо киллэрии кыһалҕалаах боппуруостарын дьүүллэһэргэ Новосибирскай, Омскай, Красноярскай, Владивосток, Хабаровскай, Артем, Чита, Кемерово, Улан-Удэ, Иркутскай, Дьокуускай, Мииринэй, Братскай, Благовещенскай, Томскай, Южно-Сахалинскай, Магадан, Ангарскай, Барнаул, Бийскэй, Комсомольска-на-Амуре баһылыктарын уонна баһылыктар бэрэстэбиитэллэрин сэргэ, РФ Судаарыстыбаннай Думатын дьокутааттара Алексей Диденко уонна Сардана Авксентьева кытыннылар.
Кыттааччылар бу сокуону олоххо киллэрэргэ муниципальнай былаастар туох кыһалҕаны көрсөллөрүн туһунан кэпсээтилэр. Үгүс дакылаатчыт бэлиэтээбитинэн, «тутан ылыы-стерилизация-вакцинация-төнүннэрии» процедура уулуссаларга дьоҥҥо ыт саба түспэтин мэктиэлээбэт уонна сир-уот экологиятын туругар дьайар. Онтон тутуллубут кырыктаах ыттары олохторун тухары приюкка тутуу бүддьүөккэ охсор. Дьэ, оччотугар тугу гынабыт?
Мунньах түмүгэр сокуоҥҥа уларытыыларга этиилэр киллэрилиннилэр. Сэбиэт быһаарыытынан, Евгений Григорьев «Кыыллары кытта эппиэтинэстээх сыһыан» сокуоҥҥа уларытыылары киллэрэр оробуочай бөлөххө АСДГ бэрэстэбиитэлинэн киллэрилиннэ.
Надежда ЕГОРОВА, «Саха сирэ» хаһыат, edersaas.ru