Евгений Григорьев томполору кытары көрүстэ

Ааптар: 
Бөлөххө киир:

Дьокуускай куорат баһылыгын эбээһинэһин толорооччу Евгений Григорьев олунньу 26 күнүгэр Томпо улууһуттан төрүттээх куорат олохтоохторун кытта көрүстэ.

Көрсүһүүнү «Саха» НКИХ  араадьыйа дириэктэрэ Николай Бястинов иилээн-саҕалаан ыытта. Тылы бастакынан Томпо улууһун салайааччыта Яков Степанов ылла уонна түгэнинэн туһанан кылгастык оройуон кэнники кэмнээҕи ситиһиилэрин билиһиннэрдэ. Баһылык үөрүүлээх сонунун үллэһиннэ, бу күннэргэ Үс Хатыҥҥа Туймаада ыһыаҕа ыытыллар сирин сүрүн ипподромугар Томпо улууһун бочуоттаах олохтооҕо – Иннокентий Саввич Свинобоев (Тыыннаахап) аата иҥэриллибит. Яков Иннокентьевич бу дьаһалга илии баттаабыт Евгений Николаевичка махтал тылларын тиэртэ. Иннокентий Тыыннаахап ат сүүрдүүтүгэр Саха АССР  маҥнайгы үтүөлээх тириэньэрэ, ат сүүрдүүтэ сайдарыгар элбэх сыратын биэрбит, аатырбыт сылгы баайааччы буолар. Ааты иҥэриигэ Николай Бястинов эмиэ сыһыаннаах, кини радиоҕа биэриитигэр Евгений Григорьев ыалдьыттыы кэлбитигэр, аһаҕас биэриигэ бу туруорсуу туһунан истээччи ыйыппыта. Онно куорат салайааччытын эбээһинэһин толоро сылдьар Евгений Николаевич боппуруоһу быһаарсыах буолбута. Ити кэнниттэн бэрт аҕыйах кэм иһигэр Тыыннаахап аатын Үс Хатыҥ ипподромугар иҥэрэр туһунан дьаһал таҕыста.


Евгений Николаевич көрсүһүүгэ томполорго бэйэтин билиһиннэрдэ. Томпо дьоно кини кэргэнэ Хаандыгаттан төрүттээҕин сэргии иһиттилэр, “күтүөппүт эбит” диэн күө-дьаа буоллулар.
Мээр эбээһинэһин толорооччу куорат хайдах сайдыахтааҕын туһунан көрүүтүн үллэһиннэ. Кэлбит дьон киниэхэ санааларын эттилэр, ыйытыы биэрдилэр.

Курашов аатынан уулуссаҕа олорор киһи куорат быылын туһунан тус санаатын эттэ: «Тоҕо кыһын суолга кумах куталларый? Биһиги куораппытыгар тымныы турбутун кэнниттэн ити наадата суох ээ! Москва, Владивосток, Новосибирскай курдук ириэрэ-ириэрэ тоҥорор халлааннаах куораттарга кумаҕы кутар дьэ оруннаах, биһиэхэ кинилэргэ курдук халтараан буолбатах. Ити кумах сайыҥҥы быыл сүрүн төрүөтэ буолар дии саныыбын”. Ону таһынан, кини күөх үүнээйи оннооҕор киин уулуссаларга суоҕун ыйда. «Суол кытыытынааҕы үөттэр бэйэлэрэ үүнэллэр, анаан олордуллубут мастар ахсааннара олох аҕыйа», — диэтэ.

Евгений Григорьев суолга билигин кутуллар кумах быыл төрүөтэ буоларын оруннаах этии диэтэ.
– Кумаҕы кутууну мин эмиэ утарабын. Ол эрээри, итини федеральнай сокуон ирдииринэн, суол министиэристибэтэ туруорсар. Мин санаабар, атын дойду уопутун туһаныахха сөп. Сорох дойдуларга бытархай өрүс кумаҕын оннугар гранит бытархайын куталлар. Ити эттик быыл буолан күдээрийбэт, сыл аайы төттөрү хомуйан ылыллар уонна саҥаттан кутуохха сөп. Дьокуускайбытыгар итинник гынан көрүөххэ сөп, — диэтэ. Евгений күөх үүнээйини олордуу куораты тупсарыы үс сыллаах бырагырааматыгар киирбитин туһунан иһитиннэрдэ, элбэх от-мас олордуллуохтааҕын эттэ.

Өссө биир сонун этии мэдисиинэ эйгэтигэр сыһыаннаах буолла. “Саха дьоно кэнники сылларга ыарахан ыарыыттан Кореяҕа баран эмтэнэн кэлэр буоллулар. Үгүстэрэ үтүөрэн кэлэллэр. Дьокуускайга Корея эмтиир киинин тутар сатаныа дуо? Дьон ыарахан сыаналаах айаҥҥа, омук балыыһатыгар сытар төлөбүргэ экэниэмийэлээн, аналлаах эмтэниини дойдуларыгар ааһан, улаханнык туһаныа этилэр” — диэн ыйытта көрсүһүү биир кыттыылааҕа. Евгений Николаевич бу этиини үчүгэйдик үөрэтиэм диэн эрэннэрдэ. «Дьиҥэр, эмп тэрилтэлэрин туһунан 131 нүөмэрдээх федеральнай сокуон этэринэн, куорат бу боппуруоһу быһаарбат. Ол эрээри, Саха сирин Бырабыыталыстыбатын бэрэссэдээтэлин солбуйааччыта Ольга Балабкинаны кытта көрсөн, ити туһунан кэпсэтэн көрүөм», — диэтэ мээр эбээһинэһин толорооччу.

Көрсүһүүгэ хаарбах дьиэттэн көһөрүү, куорат таһынааҕы учаастактарга тутууну ыытыы, оскуолаҕа оҕо миэстэтин туһунан элбэх ыйытыылар киирдилэр. Евгений Николаевич баларга барыларыгар сиһилии хоруйдары биэрдэ.

Сандал Иванов

+1
0
+1
0
+1
0
+1
0
+1
0
+1
0
+1
0