Евгений Григорьев: “Сүрүн сыал – Дьокуускай олохтоохторун хаарбах дьиэттэн-уоттан көһөрүү”

Бэҕэһээ Дьокуускай куорат баһылыгын эбээһинэһин толорооччу Евгений Григорьев “Саха” НКИХ телеханаал “Талбан” биэриитигэр кытынна. Манна кини куоракка хаарбах дьиэттэн-уоттан көһөрүү үлэтин туһунан кэпсээтэ.

– Куорат саамай сытыы проблемата мас дьиэлэр буолаллар. Ити дьиҥэр хаарбах эрэ дьиэлэргэ сыһыаннаах буолбатах, элбэх квартиралаах мас дьиэлэр бары кутталлаахтар. Бу күннэргэ алдьархай буолла – Маҕаҥҥа дьиэ умайан, 4 уонна 5 саастаах кырачаан дьон уокка былдьаннылар. Ый саҕаланыаҕыттан 4 киһи тыына быһынна. Онон мин санаабар, хаарбах да, сэнэх да буоллунар — Дьокуускайга итинник мас дьиэлэр суох буолуохтаахтар. Куорат 400 сылын көрсөрбүтүгэр ити ааспыт үйэ тутуулара дойдубут киин куоратыгар суох буолуохтаахтар. Билигин 1135 мас дьиэ баар. Биһиги өттүбүтүттэн бу дьиэлэри хаарбах быһыытынан биллэриигэ, дьону көһөрүүгэ улахан үлэ бара турар. Ил Дархан, өрөспүүбүлүкэ бу үлэни өйүүр, эбии харчы көрөр. Онон үлэ харгыһа суох бара турар. Холобур, 2019 сыл түмүгүнэн 7 тыһ. 700 кв. м., оттон 2020 сылга – 8 тыһ. кв. м. иэннээх хаарбах дьиэттэн көһөрбүппүт. 2021 сылга 47 тыһ. кв.м. былааннанан турар. Тус бэйэм бу кыһалҕаны куорат бүгүҥҥү сүрүн сыалынан ааҕабын. Дьон хаарбах мас дьиэттэн сылтаан уокка былдьанан өлүө суохтаах.

Сандал Иванов