Евгений Григорьев куорат таһынааҕы бөһүөлэктэри сайыннарыы тула кэпсээтэ
Дьокуускай мэрин эбээһинэһин толорооччу Евгений Григорьев куорат социальнай-экэнэмиическэй сайдыытын стратегиятын оҥорууну көҕүлээтэ. Ол онно үгүс болҕомто куорат таһынааҕы бөһүөлэктэри сайыннарыыга ууруллуоҕа. Маны таһынан сүрүн соругунан элбэх оҕолоох ыаллары сир учаастагынан, инженернай уонна хомунаалынай инфраструктуранан хааччыйыы буолуоҕа. Кангаласс бөһүөлэгэр устудьуоннарга аналлаах суперкампус баар буолуоҕа, Тулагыга “Саюрига” саҥа үлэ миэстэтэ тахсыаҕа, оттон Табаҕа логистическай кииҥҥэ кубулуйуоҕа. Бу уонна да атын боппуруостар тула Евгений Григорьев «Саха» НКИХ ханаалыгар «Талбан» биэриигэ кэпсээтэ.
— Бу докумуон сэттэ хайысхаттан турар. СӨ бырабыыталыстыбата, Ил Түмэн дьокутааттара буолан анал бөлөх тэрийэн үлэлээтибит. Билигин Үп министиэристибэтигэр сөбүлэһиигэ сытар. Куорат олохтоохторо киллэрбит этиилэрэ, туруорсуулара барыта кэриэтэ учуоттанна. Дьэ бу ыйаах олоххо киирдэҕинэ, тосту уларыйыылар тахсыахтара. Биһиги куораппыт эдэр дьону түмэр киининэн буолуохтаах. Москва, Санкт Петербург, Сочи курдук куораттартан хаалыылаах буолбакка, кинилэри кытары күрэстэһэр кыахтаах куорат буоларга дьулуһуохтаахпыт. Оччотугар эдэр ыччаппыт ханна да барбакка, төрөөбүт дойдутугар үлэлии, олохсуйа хаалыа. Бу ыйаахха Өлүөнэ муостатын тутуу курдук баараҕай суолталаах бырайыак эмиэ киирэ сылдьар, – диэн Евгений Григорьев иһитиннэрдэ.
«Сатал» таһыгар үс оскуоланы тутуохтара
Быһа эфир кэмигэр «Сатал» микрооройуонугар олорор ыаллартан үгүс этии киирдэ, Ол курдук хас да тыһыынча нэһилиэнньэлээх оройуоҥҥа уулуссалары сырдатыы, оптуобус сырыытын боппуруостара сытыытык тураллар. Уонна саамай кылаабынайа — оскуола тутуутун кэтэспиттэрэ ыраатта.
— «Саталга» тыа хаһаайыстыбатын сирдэрэ ИЖС-ка бэриллибиттэрэ. Ол гынан баран, сири түҥэтиигэ улахан алҕаһы оҥорон, оскуола уонна оҕо саадын тутууну учуоттаабатахтар этэ. Бүгүҥҥү туругунан куоракка 25 тыһыынча оҕо иккис симиэнэҕэ үөрэнэр. Онон оскуола тутуутун боппуруоһа түргэнник быһаарыллыахтаах. Билигин «Сатал» чугаһыгар Тулагы-Киллэмҥэ 990 миэстэлээх оскуола тутуллар. Маны таһынан элбэх оҕолоох ыаллар учаастак ылбыт «Севернай” микрооройуоннарыгар 990 миэстэлээх оскуола тутуллуохтаах. Итиэннэ суол кытыытынан, Жатай диэки Авдолян чааһынай тутааччы биир оскуоланы тутуохтаах, — диэн Евгений Григорьев кэпсээтэ.
Уулуссалары сырдатыы боппуруоһугар, мэр эбээһинэһин толорооччу Дьокуускай куорат уокуруга сырдатыынан 64% хааччыллан олорорун эттэ. 100% тириэрдэргэ өссө 7000 опораны
туруоруллуохтааҕын эттэ.
Кангаласка суперкампус баар буолуоҕа
— Табаҕанан Өлүөнэ муостата тутуллуохтаах. Онон бөһүөлэккэ туристическай кластер баар буолуоҕа. Бөһүөлэк аллараа өттүгэр баар дьиэлэр саахалланар туруктаахтар, Онон көһөрүллүөхтэрэ. Табаҕа инникитин логистическай кииҥҥэ кубулуйуоҕа, – диэн Григорьев бэлиэтээн эттэ.
Кангаласка билигин Урутаан сайдар территория үлэлиир. Алмааһы кырыылыыр кластер баар. Инникитин орто үөрэх кыһалара саҥа суперкампуска көһүөхтэрэ. Онон тас дойдуларга курдук устудьуоннар биир сиргэ үөрэниэхтэрэ.
«Саюрига» саҥа үлэ миэстэтэ тахсыаҕа
Тулагыга «Саюри» тэпилииссэ үһүс уочаратын тутуу салҕанар. 2021 сыл бүтүүтэ үлэҕэ киириэхтээх. Ааспыт сылга «Саюри» 617 туонна оҕуруот аһын бородууксуйатынан хааччыйда. Манна үлэһиттэр 70%-ра Тулагы-Киллэм олохтоохторо. Үһүс уочарат үлэҕэ киирдэҕинэ үлэһит ахсаана 80-90 киһинэн эбиллиэхтээх.
+1
+1
+1
+1
+1
+1
+1