Чурапчыттан төрүттээх куорат олохтоохторо Дьокуускай дьаһалтатын баһылыгын эбээһинэһин толорооччу Евгений Григорьевтыын көрсөн, куорат бүгүҥҥү кыһалҕаларын туһунан кэпсэттилэр. Көрсүһүүнү өрөспүүбүлүкэҕэ элбэх дьиэни туттарбыт тутуу үлэһитэ, меценат, Чурапчы улууһун бочуоттаах олохтооҕо Алексей Пинигин иилээн-саҕалаан ыытта. Бэйэлэрин эйгэлэригэр элбэх киһини кытта алтыһар бас-көс дьон кэлэн, үгүс кыһалҕалары ырыттылар. Куорат таһыгар уулуссалары сырдатыыны, оскуолаларга оҕо миэстэтэ тиийбэтин, хаарбах дьиэттэн көһөрүүнү, суол хаачыстыбатын уонна онтон да атын сытыы ыйытыылары хайдах быһыылаахтык быһаарар туһунан Евгений Григорьевтыын сиһилии кэпсэттилэр.
Биир сүрүн ыйытыынан саҥа түҥэтиллибит учаастактарга тутуу көҥүллэммэтин туһунан буолла. Дьокуускайга көһүөн баҕалаах дьон куорат аттыгар атыыланар учаастактары атыылаһан баран, дьиэ тутталлара бобуллан, улахан мэһэй буолбут. Сорохтор тутуу матырыйаалын атыыласпыттара, халлаан анныгар сытан, туһаттан тахсара кэлбит. Евгений Николаевич бу боппуруоска федеральнай уу инспекцията ирдэбиллэри туруорарын, өрөспүүбүлүкэ уонна куорат дьаһалтатын өттүттэн бу ыйытыыны сөптөөхтүк быһаарарга үлэ бара турарын эттэ.
Куорат таһыгар сытар сэлиэнньэлэргэ гаас дабылыанньата мөлтөҕүттэн үгүс ыал гааһынан туһаммакка олороллорун туһунан боппуруоһу эдэр актыбыыс Дмитрий Аммосов көтөхтө.
Көрсүһүүгэ кэлбит Чурапчыттан төрүттээх куорат олохтооҕо, өрөспүүбүлүкэ промышленноска миниистирин бастакы солбуйааччыта Михаил Кириллин: “Бу күннэргэ ити ыйытыыны Евгений Николаевичтыын ырыппыппыт. Бу сылтан ыла “дефицит пропускной способности” диэн ааспыт үйэ 70-80-с сылларыттан кыайан быһаарыллыбакка турбут кыһалҕаҕа үп-харчы көрүллэн, оннуттан хамсыахтаах”, — диэн сиһилии быһаарда. Ол курдук, быйыл Мархаттан саҕалаан, гаас дабылыанньатын көтөҕүүгэ сыл иһигэр 50 мөл. солкуобай көрүллүөхтээх.
Көрсүһүүгэ улуус ытыктанар дьоно бэйэлэрин санааларын эттилэр. Чурапчы оройуонун баһылыгынан үлэлээбит Иннокентий Аммосов чурапчылар бииргэ түмсэн олороллорун, куорат салалтата дьоҥҥо чугаһын көрөн үөрбүтүн туһунан санаатын үллэһиннэ. Мырыла нэһилиэгин баһылыга Мария Кронникова, Евгений Григорьев төрүттэрэ Мырылаҕа биллэр-көстөр дьоннор буолалларын туһунан кэпсээтэ. “Үс Түмсүү” салайааччыта Иннокентий Макаров саха сиэрин-туомун тутуһуу эдэр ыччат ортотугар тарҕанан эрэрин, куоракка ыччат түмсүүтэ хайдах быһыылаахтык сайдыахтааҕын туһунан санааларын эттэ.
Түмүккэ Евгений Николаевич түмсүбүт дьоҥҥо туһаайан маннык эттэ:
— Саха дьоно куоракка дьиҥнээхтик олохсуйан барбыттара үйэ эрэ буолла. Бары улуустартан мустан киин куоракка олохсуйбут дьон дойдубут дьонугар холобур буолуохтаахпыт. Билигин Дьокуускайга олорор дьон орто сааһа – 36. Эдэр тыыннаах куорат күүскэ сайдар, күннэтэ улаатар. Баар уонна үөскүүр кыһалҕалары сомоҕолоһон, биир сүбэнэн быһаарыстахпытына, куораппыт чэчирии сайдыаҕа, дьон олоҕо тупсуоҕа.
