Евгений Григорьев: Дьокуускай маастар-былаана стратегиябытын олоххо киллэриигэ төһүү буолар
Дьокуускай Арассыыйа үрдүнэн тэтимнээхтик сайдан иһэр биир бастыҥ куоратынан буолар. Дьокуускай баһылыга Евгений Григорьев бэлиэтииринэн, киин куораппыт сайдыытын маастар-былаанын оҥоруу стратегиятын олоххо киллэриини кытары быһаччы сибээстээх. Бу туһунан кини бүгүн “ТАСС” быһа сибээһинэн ыыппыт пресс-конференциятын кэмигэр иһитиннэрдэ.
Евгений Григорьев Градостроительнай кодекска уларыйыылар киирбиттэрин бэлиэтээн туран, бүгүн Ил Дархан Дьокуускай куорат сайдыытыгар туһуламмыт маастар-былааны оҥорууга бүтүн Арассыыйатааҕы аһаҕас куонкурус биллэрбитэ ураты суолталааҕын эттэ.
– Градостроительнай кодекска уларытыы киллэриллэн турар. Онно куорат маастар-былаана хайаатар да ирдэниллэр. Биһиэхэ билигин Дьокуускайга тупсаран оҥорууну биир ситимнээхтик ыытыы инники күөҥҥэ турар боппуруоспут. Куораппыт тас көстүүтүн тупсарыыга элбэх үлэ барыахтаах. Ол иһигэр хаарбах дьиэттэн дьону көһөрүү бырагымаатынан эмиэ. Онон бу куонкурус тэриллибитэ улахан суолталаах, туһааннаах экспертэр, исписэлиистэр этиилэрэ, көрүүлэрэ биһиэхэ күүс-көмө буолуоҕа. Билигин Дьокуускай куорат кэҥии, нэһилиэнньэтэ элбии турар. Нэһилиэнньэбит орто сааһа отутуттан тахса. Онон кэнэҕэскитин социальнай эбийиэктэргэ, сынньанар, култуурунай кииннэргэ, пааркаларга, былаһааккаларга, о.д.а. уопсастыбаннай миэстэлэргэ ноҕорууска өссө улаатыаҕа. Онон бу маастар-былаан Дьокуускай куорат стратегиятын олоххо киллэриигэ биир сүрүн докумуоммут буолар, – диэн иһитиннэрдэ.
Санатан эттэххэ, билигин хотугу улуустарга үс нэһилиэк уонна Дьокуускай куорат “Звездный” диэн түөлбэтин маастар-былааннара оҥоһуллубуттара. Саха сирэ нэһилиэнньэлээх пууннары былааннааһыҥҥа инники күөҥҥэ тахсан биир бастакынан Дьокуускайга уонна Нерюнгрига саҥа кыбартааллары тутууга үбүлээһини ылары ситиспитэ.
Вице-премьер Юрий Трутнев алтынньы бүтүүтэ ыыппыт мунньаҕар Дьокуускай куорат хайа баҕарар маастар-былааны оҥорууга, олоххо киллэриигэ Арассыыйа үрдүнэн биир бастакы буолуон сөбүн туһунан бэлиэтээн эппитэ.
Аграфена КУЗЬМИНА