Евгений Григорьев Дьокуускай куорат салайааччытын дуоһунаһыгар хандьыдаат буолла
Бүгүн, кулун тутар 4 күнүгэр, күнүс 14.00 чааска Евгений Григорьев суруналыыстары мунньан Дьокуускай куорат салайааччытын дуоһунаһыгар хандьыдаат буолбутун туһунан биллэрдэ. edersaas.ru
Көрсүһүү «Сири-уоту сайыннарар ааҕыныстыба» дьиэтигэр буолла. Хандьыдаат маҥнайгы пресс-кэмпириэнсийэтин тоҕо бу тэрилтэ дьиэтигэр ыытарын туһунан быһаарда:
— Икки сыллааҕыта куорат дьаһалтатыгар үлэбин бу тэрилтэттэн саҕалаабытым, сүрүн үлэм манна ааспыта. Онон бу көрсүһүүгэ ордук оруннаах сир буолар.
Пресс-кэмпириэнсийэ киирии дакылаата суох, тута “ыйытыы-хоруй” быһыытынан ыытылынна.
Маҥнайгы сытыы ыйытыыны «В Якутии.ру» саайт суруналыыһа Лена Тихонова ыйытта:
— Евгений Николаевич, эһиги “Биир ньыгыл Арассыыйа” партияттан хандьыдаат быһыытынан турбуккут үлэҕитигэр мэһэйдиэ дуу, көмөлөһүө дуу? Туох дии саныыгыт?
— Мин, кырдьык, “Биир ньыгыл Арассыыйа” партияттан хандьыдаат быһыытынан турдум. Бастатан туран, тус санаабын этиэм этэ, куорат салайааччытын үлэтэ ханнык даҕаны партияттан, политикаттан тутулуга суох буолуохтаах. 2019 сыллаахха куорат уокуругар үлэлии кэлэн баран, эбии үбүлээһин, үп түргэнник хамсааһына куорат кыһалҕаларын толорорго олус улахан суолталааҕын өйдөөбүтүм. Бүгүҥҥү күн туругунан куорат аҥардас бэйэтин эрэ бүддьүөтүнэн бары кыһалҕаларын хааччынар кыаҕа суох. Онон эбии үбүлээһини ситиһии куорат салайааччытын биир сүрүн эбээһинэһэ буолар. Үлэҕэ киирбитим ый ааспытын кэнниттэн бары сүрүн миэстэлэргэ — Ил Түмэҥҥэ, федеральнай министиэристибэлэргэ, араас салалталарга үксүн бу партия чилиэттэрэ олороллорун өйдөөбүтүм. Суол, сир, оскуола тутууутун кыһалҕаларын быһаарарга бу партияҕа баар дьону кытта кэпсэтэр, сөбүлэҥ түһэрсэр ирдэнэр. Онон мин ити сыл үлэҕэ туһа буолуо диэн киирбитим. Кырдьык, бырайыактар туолуулара түргээтээбитэ диэхпин сөп.
Бу кэниттэн киирбит ыйытыылар бары кэриэтэ куорат күннээҕи түбүктэригэр уонна өр сыллаах былаааннарыгар сыһыаннаах буолбуттара. ОДьКХ инфраструктуратын саҥардыы, кыстык түмүктэрэ, суол тутуута, сылаас оптуобус тохтобуллара, гаас ситимин болдьоҕо уонна да атын ыйытыылар чаас кэриҥэ уһуннаах пресс-кэмпириэнсийэ кэмигэр Евгений Григорьевка бэриллибиттэрэ.
«Саха сирэ» хаһыат, edersaas.ru