Дьокуускай баһылыгын э.т. Евгений Григорьев СӨ Дьахталлар түмсүүлэрин сойууһун кытары көрсөн, куорат сайдыытын туһунан ыйытыыларга хоруйдаата. Бу туһунан СИА иһитиннэрэр.
Киин куорат 1-кы №-дээх оскуолатын тутуу туһунан ыйытыыга маннык хоруйдаата:
— Ааспыт нэдиэлэҕэ борокуратуура суукка биэрдэ. Бу ирдэбили биһиги билинэбит, тоҕо диэтэр, оскуола дьиэтин бүгүҥҥү туруга үөрэҕирии ирдэбиллэригэр эппиэттэспэт. Оскуола сабыллыа суоҕа. Саҥа дьиэни тутар кыахтаахпыт, ол эрээри бары нуормалары учуоттаатахха, 184 миэстэлээх эрэ дьиэ тутуллар кыахтаах. Билигин оскуолаҕа 614 оҕо үөрэнэр. Билигин оскуоланы быстах дьиэҕэ көһөрөр туһунан боппуруос кылгас кэмҥэ быһаарыллыахтаах. Нэдиэлэ бүтүөр диэри бүтэһиктээх быһаарыныыны ылыахпыт, — диэн Евгений Григорьев эттэ.
Ону тэҥэ, көрсүһүүгэ Ярославскай уулуссаҕа турар 88 №-дээх уһуйаан дьиэтин өрөмүөнүн туһунан ыйыттылар. Өрөмүөн кэннэ өссө эбии 200 оҕо сылдьар кыахтаах.
— Кулун тутар бүтүөр диэри хапытаалынай өрөмүөҥҥэ тирээн турар соруктары быһаарар испииһэк оҥоһуллуо. Бу испииһэккэ 88 №-дээх уһуйааны эмиэ киллэриэхпит. Эбии миэстэлэр арыллаллара олус үчүгэй, — диэн кини эттэ.
Ону тэҥэ, көрсүһүүгэ олорор дьиэлэр хапытаалынай өрөмүөннэрин, куорат киинигэр массыына парковкатын, тулалыыр эйгэни харыстааһын, о.д.а. боппуруостар таарылыннылар. Евгений Григорьев бу боппуруостар куорат дьаһалтатыгар көрүллүөхтэрэ диэн эрэннэрдэ.
Ангелина Васильева, “Саха сирэ” хаһыат, edersaas.ru