“МИНИСТР — 2013” дьыалабыай оонньууга кыайбыт, билигин Инновационнай менеджмент үрдүкү оскуолатын ректорын бырайыагынан үлэлээһиҥҥэ солбуйааччы Евгений Григорьев бэлиэтииринэн, «МИНИСТР» оонньуу хамаанданан биир бырайыакка үлэлии үөрэнэргэ төһүү күүс буолар.
Санатан эттэххэ, былырыыҥҥыттан судаарыстыбаннай былаас уорганыгар бырайыагынан үлэ киирбитэ. Ил Дархан Егор Борисов от ыйын 7 күнүгэр судаарыстыбаннай былаас уорганыгар бырайыагынан үлэ киириитин туһунан ыйааҕа тахсыбыта. Оттон күһүн балаҕан ыйыгар Сочитааҕы форумҥа премьер-миниистир Дмитрий Медведев бу туһунан эмиэ бэлиэтээн эппитэ.
Онон былырыыҥҥыттан саҕалаан Россия үрдүнэн бырайыагынан үлэҕэ улахан хамсааһын таҕыста. Биһиги өрөспүүбүлүкэбитигэр анал департамент тэриллэн, Салайар институт Инновационнай менеджмент үрдүкү оскуолатыгар кубулуйан. үлэ тэтимин ылан эрэр. Ааспыт сылга Евгений Григорьев Үрдүкү оскуола бырайыагынан үлэлээһиҥҥэ ректоры солбуйааччынан анаммыта.
Евгений Николаевич бэлиэтииринэн, бырайыагынан үлэ — билиҥҥи кэм ирдэбилэ. “Иккис куурустан предпринимательствонан дьарыктанабын. Онон бырайыагынан үлэ миэхэ чугас. Бырайыагынан үлэҕэ саамай сүрүнэ уопсай түмүккэ үлэ төһө көдьүүстээхтик оҥоһуллубута тахсар.
Ону сэргэ, бырайыагынан үлэ каадыры талыыга үчүгэй. Эдэрдэр бу бырайыактары лифт оҥостон карьераларын оҥостуохтарын сөп. Бу хас биирдии киһини кынаттыыр. Онон “МИНИСТР” дьыалабыай оонньуу кыттыылаахтара бырайыагынан үлэҕэ олоҕуран сорудахтарын толороллоро сөп. Киһи куруутун үөрэниэхтээх, саҥаны, сонуну билэргэ дьулуһуохтаах. Онон, мин санаабар, хас биирдии кыттааччы бу мантан бэйэтигэр туһалааҕы сүһэн ылыаҕа”, — диэн бэлиэтиир Евгений Григорьев. Ону сэргэ, кини салайар үлэ бу ньымата кумааҕы эргиирин судургутутарга туһуланарын этэр. “Судаарыстыба бу инструмена (бюрократизм) суох үлэлээбэт. Ол эрээри көдьүүстээх буолуохтаах. Этэргэ диэри, ыспыраапка ыспыраапканы көрдүөххэ эрэ диэн буолбакка, киһи кыһалҕатын быһаарарга үлэлиэхтээх”, — диэн бэлиэтиир Евгений Николаевич.
Билигин Инновационнай менеджмент үрдүкү оскуолатын нөҥүө 90 муниципальнай, 120 судаарыстыбаннай үлэһит бырайыагынан үлэҕэ үөрэннэ. “Тус бэйэм Великобритания холобурун көрөбүн. Бырайыагынан үлэ предпринимательствоҕа олус көдьүүстээх. Ону сэргэ, салайар үлэҕэ эмиэ көдьүүстээх ньыма буолара дакаастанан турар. Онон билигин биир систиэмэ оҥорон судаарыстыбаннай таһымҥа бэйэбитигэр киллэриэхпитин наада”, — диэн этэр проректор.
Түмүккэ, Евгений Григорьев “МИНИСТР” оонньуу кыттыылаахтарыгар туһаайан манныгы бэлиэтиир.
— Киһи манна бэйэ эрэ туһугар үлэлиирин тохтотон, хамаанданан үлэлии үөрэнэр. Кыттааччылар кылгас кэм иһигэр теорияны үөрэтэн быраактыкаҕа туһанарга үөрэниэхтээхтэр. Бу – инники үлэлэригэр олус туһалаах. Аҕыйах сылынан бырайыагынан үлэ барытыгар киириэҕэ, — диэн этэр Евгений Николаевич.
Аграфена КУЗЬМИНА, «Саха сирэ» хаһыат, edersaas.ru