Бэлиитикэ Сүрүн

Евгений Федоров: «Быыбарга дьон кыттыыта көхтөөх»

Быйылгы быыбарга Саха сириттэн барыта 337 758 киһи кытынна. Ити быыбардааччылар ахсааннарыттан 51,23 % ылар. Судаарыстыбаннай Дуума ааспыт быыбарын кытары тэҥнээтэххэ, нэһилиэнньэ куоластааһыҥҥа көхтөөхтүк кытынна. Бу туһунан уонна быыбар барыллаан түмүгүн Быыбар киин хамыыһыйатын бэрэссэдээтэлэ Евгений Федоров бүгүн пресс-кэмпириэнсийэ кэмигэр иһитиннэрдэ.

Судаарыстыбаннай Дуума ааспыт быыбарыгар Саха сирин куоластааччылара 48,11 % тахсыбыт эбит буоллахтарына, быйыл ити көрдөрүү 51,23 % тэҥнэстэ. Ордук Анаабыр, Өлөөн, Горнай, Үөһээ Бүлүү, Таатта, Уус Алдан улуустара көхтөөхтүк кытыннылар. Мобильнай куоластааччы ньыманан 46 671 киһи туһанна. Киин сиртэн ыраах, суола-ииһэ суох сирдэргэ уопсайа 9 428 киһи болдьоҕун иннинэ куоластаабыта. Өрөспүүбүлүкэ үрдүнэн барыта 822 быыбар хамыыһыйата үлэлээтэ. Евгений Федоров иһитиннэрбитинэн, бу хамыыһыйаларга барытыгар 6 600 үлэһит сыһыарыллан үлэни-хамнаһы ыытта.

– Биһиги өрөспүүбүлүкэбитигэр үс таһымнаах быыбардар буолан аастылар. Ол курдук, Судаарыстыбаннай Дуума быыбарын таһынан Ил Түмэн дьокутааттарыгар эбии быыбар уонна муниципальнай быыбардар буоллулар. Муниципальнай таһымҥа уопсайа 76 быыбар хампаанньата ыытылынна. Ити быыбардары барытын өрөспүүбүлүкэ үрдүнэн 35 территориальнай быыбардыыр хамыыһыйа, 822 быыбардыыр учаастак салайан ыытта. Хас биирдии быыбардыыр учаастак туох баар санитарнай-эпидемиологическай ирдэбиллэри барытын тутуһан үлэлээтэ, – диэн  Евгений Николаевич бэлиэтиир.

Бэрэссэдээтэл быйыл уопсастыба өттүттэн быыбары кэтээн көрүү хаһааҥҥытааҕар даҕаны ордук күүскэ барбытын бэлиэтиир.

– Быйыл уопсастыбаннай палаата, ону сэргэ баартыйалар бэйэлэриттэн туруорбут кэтээн көрөөччүлэрэ быыбар кэмигэр көхтөөхтүк кытыннылар. Ол курдук, куоластааһын бастакы күнүгэр 3397, иккис күҥҥэ – 3929, үһүс күҥҥэ – 3981 киһи сырытта. Хас биирдии быыбардыыр учаастакка видеокамералар турбуттара, олор үс күн устата, ол эбэтэр 72 чаас, тохтоло суох үлэлии турдулар, – диэн бэлиэтиир кини.

Быыбар барыллаан түмүгүнэн, өрөспүүбүлүкэ үрдүнэн, баартыйанан куоластааһыҥҥа “КПРФ” – 35,15%, “Биир ньыгыл Арассыыйа” – 33,22%, “Новые люди” – 9,87%, “Сиэрдээх Арассыыйа-кырдьык туһугар”– 8,19%, “ЛДПР” – 5,14% ыллылар.

Биир мандааттаах быыбардыыр уокурукка Саха сирин дьоно Петр Аммосовка (“КПРФ”) – 21,615, Петр Черкашиҥҥа (“Биир ньыгыл Арассыыйа”) – 20,07%, Федот Тумусовка (“Сиэрдээх Арассыыйа-кырдьык туһугар”) – 19,55%, Василий Николаевка (“Новые люди”) – 15,52%, Егор Жирковка (“Зеленые”) – 6,27% куоластарын биэрдилэр.

Быыбар бүтэһиктээх түмүгэ Быыбар киин хамыыһыйата боротокуоллары барытын бигэргэттэҕинэ тахсыаҕа. Киин хамыыһыйа хандьыдааттартан, баартыйалартан киирбит үҥсүү суруктары кылгас кэм иһигэр көрүөҕэ.

Аграфена КУЗЬМИНА,

Мария ВАСИЛЬЕВА (СИА) хаартыскаҕа түһэриитэ.

1
0