Евгений Чекин венчурнай хампаанньа олохтоох оҥорон таһаарыы пуондатын тэрийэр былаанын билистэ
Бырабыыталыстыба Бэрэссэдээтэлэ Евгений Чекин өрөспүүбүлүкэ сайдыытын институтун кэскилин дьүүллэһиигэ анаммыт көрсүһүүлэри «Саха сирэ» венчурнай хампаанньа үлэтин-хамнаһын билсиһииттэн саҕалаата.
«Саха сирэ» венчурнай хампаанньа» аахсыйалааах уопсастыба 2011 с. эрэгийиэн баалабай оҥорон таһаарыытыгар дьоҕус уонна орто предпринительство ылар өлүүтүн улаатыннарыы технологиятыгар үлэлиир инновационнай хампаанньалары уонна предпринимателлэри өйүүргэ анаммыт сайдыы институтун быһыытынан тэриллибитэ. Хампаанньа генеральнай дириэктэрэ Алексей Загоренко этэринэн, 2017 с. алтынньы 31 күнүнээҕи туругунан, инвестиция бартыбыала 329,7 мөл. солк. буолбут, маны таһынан 140 мөл. солк. сайдыы атын институттарыгар ыытыллыбыт. Бу сыллар усталарыгар 48 бырайыакка 672,4 мөл. солк угуллубут. Хампаанньа билиҥҥи соруктарыттан биирдэстэрэ – олохтоох производство пуондатын тэрийии буолар эбит, онуоха ирдэнэр докумуоннар бырайыактара, ол иһигэр пуонда стратегиятын бырайыага оҥоһуллубуттар. Пуонда олохтоох табаары оҥорооччулар көдьүүстээх бырайыактарын өйүөхтээх, сойуому сэттэ сылга болдьохтоон, 3 мөлүйүөнтэн 40 мөл. солк. диэри биэриэхтээх. Үлэ чиэһинэй, аһаҕас буолуутун хааччыйан, уопсастыбаннай сэбиэт тэриллиэхтээх.
– Предпринимательствоны сайыннарыы пуондатыгар уонна бааннарга хатыласпат туһугар, биһиги бырайыактарга маннык ирдэбили туруорабыт: былааннанар бородууксуйа эбэтэр өҥө улуус, өрөспүүбүлүкэ ырыынагар саҥа көрүҥ итиэннэ тупсарыллыбыт хаачыстыбалаах, саҥа технологиялаах, сыаната намыһах буолуохтаах, «Саха Сиригэр оҥоһулунна» брендинэн батарарга сөп түбэһиэхтээх, – диэтэ Алексей Загоренко.
Евгений Чекин хампаанньа үлэтин аналын тэрилтэҕэ барытыгар барсар уопсай тылларынан быһаарбакка, тус уратыны чорботон көрдөрөргө эттэ. Стратегическай соруктар уонна дьаһаллар испииһэктэригэр, инвестиция сойуомун усулуобунай киэбигэр уларытыылары киллэрии наадатын бэлиэтээтэ. Сойуом суумматын 100 % хааччыйыы былааныгар кэккэ ыйытыылары биэрдэ. Итинник ырычааҕынан тэрийдэххэ, сойуому уонча эрэ киһи ылар кыахтаныаҕын, оттон өйөбүлгэ хас эмэ сүүһүнэн предприниматель наадыйарын санатта. Маркетологтар үлэлэрин көдьүүстээхтик тэрийэргэ, экспортка тахсарга сыалланарга сорук туруорда.
Ил Дархан сүбэһитэ Екатерина Кормилицына, инвестиционнай сайдыы уонна предпринимательства миниистирэ Антон Сафронов, Сайдыы корпарацяятын генеральный дириэктэрэ Пётр Алексеев уо.д.а. санааларын этиннилэр. Мунньаҕы түмүктүүрүгэр Евгений Чекин дьүүллэһиигэ киирбит этиилэри хампаанньа стратегиятын саҥаттан оҥороругар учуоттууругар эрэнэрин биллэрдэ.
Раиса Сибирякова, Саха сирэ” хаһыат, edersaas.ru.