Евгений Чекин: Салалта киинин тэрийиигэ эбии үлэ миэстэтэ көрүллүбэт
Уларытыллан тэриллэр Салалта киинигэр эбии штат көрүллүбэтин, эрдэттэн үлэлии сылдьар исписэлиистэр тардыллалларын туһунан СӨ бырабыыталыстыбатын бэрэссэдээтэлэ Евгений Чекин тоһоҕолоон бэлиэтээтэ.
Ил Дархан Егор Борисов тохсунньу 18 күнүгэр илии баттаабыт «Саха Өрөспүүбүлүкэтигэр судаарыстыбаннай салалта ситимин көдьүүһүн үрдэтэр туһунан» ыйааҕын чэрчитинэн, кулун тутар 1 күнүгэр диэри Салалта киинэ уларытыллан тэриллиэхтээх.
— Бу ыйаах кэккэ уларытыылары да киллэрэр, туруоруллубут соруктары да толорууга былаас ситэриилээх уорганнарын көҕүлүүр, — диир Евгений Чекин. — Боччумнаах уларытыы Экономика министиэристибэтин иһинэн барыаҕа. Онуоха судаарыстыбаннай уонна муниципальнай сулууспалаах ахсаана төрүт эбиллиэ суоҕа, эрдэттэн үлэлии сылдьар, сөптөөх бэлэмнээх исписэлиистэр тардыллыахтара. Бырайыактарынан салайыы бырабыыталыстыба туруорар соруктарын олоххо киллэрии дьаһалларын 20-30 %-ын “сабарынан”, Ил Дархан уонна Бырабыыталыстыба дьаһалтатын иһинэн үлэ хаамыытын салайар департамент тэриллиэҕэ. Бу департамент судаарыстыбаннай уорганнар үлэлэрин-хамнастарын сыаналыыр-ырытар методолог оруолун толоруоҕа, боломуочуйалар уонна эбээһинэстэр хатыланыыларын туоратыыга, судаарыстыбаннай өҥөлөрү оҥоруу болдьохторун кылгатыыга итиэннэ ыытыллар үлэ-хамнас социальнай көдьүүһүн уонна үтүө түмүктээх буолуутун үрдэтиигэ үлэлиэҕэ.
Саҥа департамент сэттэ биэдэмистибэни, ол иһигэр Бырайыактарынан салайыы департаменын, Стратегическай салайыы департаменын, Каадыр бэлиитикэтин, судаарыстыбаннай уонна муниципальнай сулууспа департаменын, Корпоративнай технологиялары уонна үп-харчы мониторинын бырайыактыыр офиһы, Биир кэлим интегрированнай коммуникационнай уонна иһитиннэрэр-аналитическай IT-ситими бырайыактыыр офиһы итиэннэ “Инновационнай менеджмент үрдүкү оскуолата” судаарыстыбаннай-автономнай тэрилтэни кытары уларытыллан тэриллэр Салалта киинигэр киириэҕэ. Санатан эттэххэ, бу киин кулун тутар 1 күнүгэр диэри тэриллиэхтээх. Егор Борисов ыйааҕа салалта судаарыстыбаннай уорганнарын уонна биирдиилээн судаарыстыбаннай сулууспалаахтар үлэлэрин көдьүүһүн итиэннэ түмүктээх буолуутун үрдэтиигэ туһаайыллар.
РФ Президенин иһинэн Норуот хаһаайыстыбатын уонна судаарыстыбаннай сулууспа Россиятааҕы академиятыгар баар Салалта киинэ эмиэ маннык хабааннаахтык уларытыллан тэриллибитэ Ил Дархан ылыммыт быһаарыыта тоҕоостоох кэмигэр ылыллыбытын уонна федеральнай бэлиитикэҕэ сөп түбэһэрин көрдөрөр.
Раиса СИБИРЯКОВА, “Саха сирэ” хаһыат, edersaas.ru