Алмаастаах түбэ киинигэр, Мииринэйгэ, ситэриилээх былаас отчуотун бырабыыталыстыба бэрэссэдээтэлэ Евгений Чекин туруорар.
Мииринэй — өрөспүүбүлүкэ биир саамай түргэн тэтиминэн үүнэн-сайдан иһэр миниципальнай тэриллиитэ. 2017 сыл түмүгүнэн, өрөспүүбүлүкэҕэ оройуон сир баайын хостооһуҥҥа бастакы, инвестицияларга алтыс, норуот туттар табаарын тиэйиигэ-таһыыга төрдүс, дьону тиэйиигэ-таһыыга бэһис, биирдиилээн эргиэҥҥэ үһүс, уопсастыбаннай аһылыгы тэрийиигэ үһүс, нэһилиэнньэҕэ төлөбүрдээх өҥөнү оҥорууга иккис миэстэ буолбут. Нэһилиэнньэ ахсаана 2014 сылтан эбиллэ турар, үлэтэ суох буолуу таһыма 4,5 %-ҥа тэҥнэспит, ити өрөспүүбүлүкэ орто көрдөрүүтүттэн 7,2 %-нан намыһах. Улуус дьаһалтатыгар тэриллибит көрсүһүүгэ бырабыыталыстыба бэрэссэдээтэлэ оройуон социальнай-экономическай сайдыытын стратегиятын ырытан оҥорорго уонна тирээн турар соруктары олоххо киллэрэргэ тирэх буолар туһугар, өрөспүүбүлүкэ бырабыыталыстыбата ааспыт сыл бүтүүтэ миниципальнай тэрээһин социальнай-экономическай сайдыытын дьаһалларын былаанын ылыммытын, үлэ-хамнас онон салайтарылларын кэпсээтэ. 2018 сылга социальнай эбэһээтэлистибэлэри толорон, нэһилиэнньэ харчынан дохуотун улаатыннарыы чэрчитинэн социальнай быһыы-майгы бигэ туруктаах буолуутун ситиһии сүрүн сорук быһыытынан турарын эттэ.
— Дьарыктаах буолууну көҕүлээһин сылыгар үлэтэ суох ахсаанын аҕыйатыыга итиэннэ олохтоох дьону үлэнэн хааччыйыыга үлэлиибит, — диэтэ Евгений Чекин түмүгэр.
Олохтоохтор Мииринэй куоракка «Стройгрупп» хампаанньа 2016 сылтан элбэх кыбартыыралаах дьиэ өрөмүөнүн бүтэрэ илигин эттилэр. «Кыбартыырабытыгар 15 кыр. эрэ сылаас, халыҥ таҥаһынан сылдьан тоҥобут. Хампаанньа үлэтин хаачыстыбата мөлтөҕөр эбии өрөмүөнү төрүт бүтэрбэккэ сыһа-соһо сылдьар», — дэстилэр Экспедиционнай уулусса 1 №-дээх дьиэтин олохтоохторо. Онуоха, куорат дьаһалтатын баһылыга Клим Антонов бэдэрээтчити саҥаттан булар үгүс бириэмэни эрэйэрин иһин, ити хампаанньаны кытары дуогабар 2018 сылга диэри уһатыллыбытын, ол быһыытынан «Стройгрупп» уон алта дьиэҕэ хапытаалынай өрөмүөнү оҥорорго эбээһинэстэнэрин, ону дьаһалта хонтуруолга тутарын эттэ.
— Бэдэрээтчит олохтоохтору кытары өссө төгүл көрсөн, үлэтин былаанын билиһиннэрдин, Мииринэй баһылыга бэйэтинэн бу хампаанньаны мэктиэҕэ ылар эбит, ол эрээри, табыллыбатаҕына, Хапытаалынай тутуу пуондатын кытары туспа кэпсэтии барыаҕа, — диэтэ Евгений Чекин.
Раиса Сибирякова, edersaas.ru