Бырабыыталыстыба Бэрэссэдээтэлэ Евгений Чекин уонна Ил Түмэн бэрэссэдээтэлэ Александр Жирков муус устар 20 күнүгэр Москваҕа Егор Борисов салайан ыыппыт сүбэ мунньаҕар кыттыыны ыллылар.
Ил Дархан бастатан туран, уоппускатыттан эрдэ тахсарын иһитиннэрдэ.
– Москваҕа РФ Үбүн миниистирин кытары көрсүөхтээхпин, Экономическай сайдыы министиэристибэтигэр сылдьыам итиэннэ АЛРОСА кэтээн көрөр сэбиэтин мунньаҕар кыттыахтаахпын. График ыгым, – диэтэ Егор Борисов.
Премьер-миниистир өрөспүүбүлүкэ 2018 сыл бастакы кыбаарталыгар социальнай-экономическэй көрдөрүүлэрин туһунан иһитиннэрии оҥордо. Туһалаах баайы хостооһун көрдөрүүтэ үрдээбит: гаас – 4,5 %, көмүстээх рууда 30 %. Алмааһы хостооһун былаана 101,2 % туолбут. Ааспыт сылы кытары тэҥнээтэххэ, сүрүн хапытаалга үбү угуу 12 % улааппыт. Тутууга көрдөрүү куһаҕана суох, 2017 с. туһааннаах кэмигэр тэҥнээтэххэ, 35 %-ынан элбэх дьиэ үлэҕэ киллэриллибит. Эрэгийиэн баалабай бородууксуйатын үүнүүтэ 3,7 %-ҥа тэҥнэспит.
— 2017 с. кытары тэҥнээтэхэ, тэрилтэлэр үптэрин сальдота 42,4 %-ынан элбэх буолла, ити бырамыысаланнай тэрилтэлэр туруктара тупсубутун көрдөрөр, – диэтэ Евгений Чекин итиэннэ көрдөрүү намтааһына тыа хаһаайыстыбатын табаарын оҥорууга, таһаҕаһы тиэйии уонна пассажирдары таһыы өҥөтүн оҥорууга бэлиэтэнэрин эттэ.
Егор Афанасьевич кыһыҥҥы суолунан хотугу улуустарга таһаҕаһы таһыы туругун туһунан ыйыппытыгар, Бырабыыталыстыбата Бэрэссэдээтэлэ итиннэ графиктан хаалыы суоҕун, таһаҕаһы таһыы түмүктэнэн эрэрин туһунан дакылааттаата. Билигин сааскы халааны хоромньута суох көрсөргө уонна навигацияны саҕалыырга тэрээһин үлэ ыытылларын кэпсээтэ.
Раиса Сибирякова, Саха сирэ” хаһыат, edersaas.ru