Евгений Чекин: Бэтэрээннэр иннилэригэр кыбыстыбат курдук олоруох, үлэлиэх тустаахпыт

Бырабыыталыстыба бэрэссэдээтэлэ Евгений Чекин Улуу Кыайыы 73 сылыгар анаммыт үөрүүлээх мунньахха бэтэрээннэри эҕэрдэлээтэ

edersaas.ru

— Ыам ыйын 9 күнэ саамай сырдык бырааһынньык, улуу держава кыаҕын, модунун символа, киэн туттуу уонна албан аат күнэ. Бу күн фроҥҥа уонна тыылга Кыайыыны уһаммыттары ахтабыт-саныыбыт, — диэтэ Евгений Чекин уонна Улуу Кыайыы туох толугунан ситиһиллибитин санатта. — Саха сириттэн уоттаах сэриигэ 62 тыһ. киһи барбыта, элбэх буойун Ийэ дойду көмүскэлигэр сырдык тыынын толук уурбута. Холобура суох хорсун быһыыны көрдөрөн, 24 киһи Сэбиэскэй Сойуус Дьоруойа, биир киһи Арассыыйа Дьоруойа, биэс киһи “Албан аат” уордьан толору кавалера буолбуттара. Сэрии сылларыгар 2 тыһ. 300 киһи, 1946-1947 сс. 9 тыһ. 150 киһи бойобуой уордьаннарынан уонна мэтээллэринэн наҕараадаламмыттара. Сут, кураан эҥэрдээх сэрии сылларыгар Саха сирин олохтоохторо тыылга хорсуннук үлэлээбиттэрэ, “Барыта — фронт туһугар, барыта — Кыайыы туһугар!” девиһинэн салайтаран, эти-үүтү туттаран, сылаас таҥаһы тигэн, күндү түүлээҕи, балыгы бултаан, көмүһү хостоон оборуона пуондатын хаҥаппыттара. Аҕа дойдуну көмүскүүр Улуу сэрии таарыйбаатх ыала биһиэхэ суох. Биһиги ытык иэспит — итини өйдөөһүн… Ол иһин Кыайыы күнүгэр ыччаттар эһэлэрин, хос эһэлэрин, сэрии уонна тыыл бэтэрээннэрин, мэтириэттэрин илиилэригэр тутаннар, «Өлбөт үйэлээх полк» норуот аахсыйатыгар маассабайдык тахсаллара өрөспүүбүлүкэ үрдүнэн сыллата тутуһуллар үтүө үгэс буолла. Бүгүн биһиги, кыайбыт норуот ыччаттара, бэтэрээннэр иннилэригэр кыбыстыбат курдук олоруох уонна үлэлиэх-хамсыах тустаахпыт. Дойду героическай историятынан киэн туттуу аныгы Арассыыйа сайдыытын бөҕө тирэҕэ, саҥа көлүөнэ ыччакка сиэр-майгы суолдьута буолар.

Раиса Сибирякова, “Саха сирэ”, edersaas.ru