Уопсастыба

Евдокия Винокурова: “Сүөһүбүн атахпар уйуттан турарым тухары ииттиэм”



Саха сүөһүтэ” генофонднай хааһына тэрилтэтин дириэктэрэ Александр Артемьев суолу баттаһа ыраах Өймөкөөн улууһун, Өймөкөөн нэһилиэгин Биэрэк Үрдүн учаастагар баар салаа үлэтин-хамнаһын көрөн-истэн кэллэ.

edersaas.ru


Ону таһынан, Томпо улууһун баһылыгын көрдөһүүтүнэн, Хаандыгаттан соҕуруу 20 көс ыраах, Алдан өрүс үрдүгэр турар Охотскай Перевоз нэһилиэгин олохтоохторо саха сүөһүтүн иитиэхтэрин баҕаралларын биллэрбиттэрин көрсөн, сирдэрин-уоттарын үөрэттэ. Саха төрүт сүөһүтэ иитиллэр сирин-уотун кэнэтэр сыалтан уонна Өймөкөөн улууһун баһылыгын көрдөһүүтүгэр олоҕуран, Тыа хаһаайыстыбатын министиэристибэтин дьаһалынан 2011 сыллаахха алтынньыга Амма улууһун Олом Күөлүттэн 18 саха сүөһүтэ, ол иһигэр 14 ынах Өймөкөөҥҥө, Биэрэк Үрдэ диэн сиргэ тиэрдиллэн, саҥа салаа тэриллибитэ.

“Саха сүөһүтэ” ГХТ  дириэктэрэ Александр Артемьев Өймөкөөн улууһун Биэрэк Үрдүн учаастагар баар салаа салайааччыта Евдокия Винокурованы кытары

Биэрэк Үрдүнээҕи салаа салайааччытынан тыа сирин үлэтигэр уопуттаах, бухгалтер идэлээх, “Гражданскай килбиэнбэлиэ хаһаайката, Саха Өрөспүүбүлүкэтин тыатын хаһаайыстыбатын туйгуна Евдокия  Винокурова анаммыта. Кини кыһамньылаах көрүүтүн-истиитин түмүгэр, 2019 сыл саҕаланыытыгар сүөһү ахсаана 46 буолбута, инньэ гынан, үрдүкү салалта 26 сүөһүнү, ол иһигэр тоҕус ынаҕы Амма улууһун Болугур нэһилиэгэр аҕалбыта.

Саха төрүт сүөһүтэ Өймөкөөн сирин сөбүлээтэ

Билигин Биэрэк Үрдүгэр 22 саха сүөһүтэ, ол иһигэр тоҕус ынах итиэннэ иллэрээ сыллааҕыта хааны тупсарыыга илдьиллибит Оҕонньор диэн биэс саастаах атыыр оҕус бааллар.

Оҕонньор барахсан!

Нэһилиэнньэни кытары көрсүһүүгэ Өймөкөөн нэһилиэгин баһылыга Павел Васильев Өймөкөөн “Тымныы оройо” буоларынан, сыллата элбэх турист кэлэрин уонна эһиил, 2021 сылга, “Олоҥхо ыһыаҕа” ыытыллара былааннанарын быһыытынан, сахалар ХХ үйэ саҕаланыытыгар олорбут олохторун-дьаһахтарын, сүөһүлэрин-астарын көрдөрөр туристическай комплекс тутулларын туһунан кэпсээтэ. Онуоха саха сүөһүтүн ахсаанын элбэтэр интэриэстээхпит, салаа үлэтигэр-хамнаһыгар бары өттүнэн күүс-көмө буоларга бэлэммит диэтэ. Былырыын күһүн дьаһалта икки километр усталаах, үрдүк кыамталаах подстанциялаах, (500 тыһ. солк. сыаналаах) уот ситимин тардан биэрбит. Быйылгыттан от боппуруоһун быһаарсарга үлэлэһиэх буолла.

Саха сүөһүтэ олохтоох дойдутугар тарҕанарыгар, тэнийэригэр атахпар турарым тухары, умса түһүөхпэр диэри үлэлэһиэм, — диир Евдокия Захаровна. – Үүтэ аҕыйах дииллэр да, сыата (6 – 8%) үрдүгүнэн үүт базиснай сыатыгар (3,4 %) таһаардахха, симмэнтээлтэн хаалсыбат. Аска-үөлгэ талымаһа суох, Өймөкөөн тоһуттар тымныытын тулуйар, сыа быыстаах, хоргуннаах мииннээх, наһаа сымнаҕас, минньигэс эттээх уонна сүөһү сыстыганнаах ыарыыларыгар олох ылларбат, дьиэмсэх, сымнаҕас, киһи саҥарарын өйдүүр. Аны күһүн кыстыкка киирэргэ 50 сүөһү турар саҥа хотонун туттуохпут, матырыйаала тиэллэн кэлэн сытар. Ил Дархан ыйааҕын олоххо киллэрэргэ, 2024 сылга диэри сүөһүбүт ахсаанын 50-ҥа тиэрдэр соруктаах иккиэ буолан үлэлиибит. Уолум, Дьулустаан Гаврильевич, идэтинэн үрдүк үөрэхтээх программист, кэргэнэ олохтоох дьаһалтаҕа бухгалтер, икки оҕолоохтор. Дьулустаан кыра сааһыттан сүөһүгэ сыстаҕас. Саҥа хотоммут тутуутун, күрүө-хаһаа уо.д.а. хаһаайыстыбаннай дьаһаллары барытын кини тэрийэр. Өрөспүүбүлүкэ баһылыга сөптөөх дьаһалы таһааран, “Саха сүөһүтэ” хааһына тэрилтэтин тэрийбитин иһин улахан махталбын тиэрдэбин!

Тыйыс тымныылаах хоту дойду хоһуун кыыһа Евдокия Захаровна Винокурова үс оҕолоох, икки сиэннээх, тулаайах хаалбыт аймахтарын оҕолорун, үс оҕону, ылан ииппит. Нэһилиэгэр биир саамай ытыктанар дьоһун-мааны Далбар Хотун диэн Саха сүөһүтэ” генефонднай хааһына тэрилтэтин эппиэттээх үлэһитэ Олег Марков кэпсээтэ.

Раиса Сибирякова, «Саха сирэ» хаһыат, edersaas.ru

Хаартыскаҕа Олег Марков түһэриилэрэ.

1
0

Санааҕын суруй