Айсен Николаев сэтинньи 22 күнүгэр таһаарбыт «Саха Өрөспүүбүлүкэтигэр үөрэхтээһин сайдыытын стратегическай хайысхаларын туһунан» ыйааҕар 2024 сылга диэри үөрэхтээһин хаачыстыбатынан Арассыыйа 15 бастыҥ субъегын кэккэтигэр киирэр туһугар үс ойуччу тутуллар сыал ыйыллыбыта.
edersaas.ru
Дьокуускай куорат Думатын бэрэссэдээтэлин бастакы солбуйааччы Евдокия Евсикова эдэр ыччакка хаачыстыбалаах үөрэхтээһин тииһилэҥнээх буолуута биир чорботуллар сорук буоларын бэлиэтиир. Ил Дархан саҥа ыйааҕар тирэҕирэн, үөрэхтээһини сайыннарыыга элбэх бырайыак олоххо киллэриллиэҕин этэр.
— Үөрэхтээһин хаачыстыбатын тупсарыы үлэтин күн бүгүҥҥүттэн итиэннэ сүрүн акылаат ууруллар сириттэн, оскуолаҕа киириэн иннинээҕи саастаах оҕолору иитэр тэрилтэлэртэн, саҕалыыр наада. 2021 сылга хас биирдии улууска уонна куораттарга эбии үөрэхтээһин кииннэрэ тэриллиэхтэрэ, 2024 сылга муниципальнай оҕо технопааркалара баар буолуохтара итиэннэ өрөспүүбүлүкэ үрдүнэн 17-тэн итэҕэһэ суох цифровой үөрэхтээһин кииннэрэ, аан дойду таһымнаах Научнай-үөрэтэр киин, өрөспүүбүлүкэтээҕи анал IТ-лиссиэй баар буолуохтара. Онон, өрөспүүбүлүкэ салалтатын, киин куорат дьаһалтатын иннилэригэр оҕолор уонна ыччаттар дьоҕурдарын, талааннарын арыйарга уонна өйүүргэ улахан сорук турар. Бары бииргэ түмсэммит бу дьоһун соруктары толоруохпут уонна үүнэр сүһүөх көлүөнэни дойду бастыҥ эрэгийиэннэрин кытары тэҥ хаачыстыбалаах үөрэҕинэн хааччыйыахпыт диэн мин эрэнэбин, — диэтэ киин куорат Думатын бэрэссэдээтэлин бастакы солбуйааччы.
Анна НАУМОВА, «Саха сирэ» хаһыат, edersaas.ru саайтка анаан
+1
+1
+1
+1
+1
+1
+1