С.А. Зверев-Кыыл Уолун аатынан Национальнай Үҥкүү тыйаатыра “Киһи” диэн этнобалеты туруоран көрдөрдө.
Ахсынньы 17 күнүгэр Өксөкүлээх Өлөксөй аатынан култуура киинигэр киһи лыык курдук толору муһунна. Бүгүн – премьера! Артыыстар да, көрөөччүлэр да долгуйаллара көстөр.
Уот-күөс умуллан, сыана быыһа арыллар… Бастакы мүнүүтэттэн испэктээкил көрөөччүнү абылаан, биир тыынынан олорон көрдүбүт. Ол курдук умсугутар, көстүүтэ абылыыр эбит.
Саха итэҕэлинэн, Айыылар күүстэринэн сир-дойду, дьон-аймах айыллыытыттан саҕаланар. Сыанаҕа аан бастакытын, Үрүҥ Аар Тойонтон саҕалаан, саха таҥараларын барыларын, кинилэр дьоҥҥо дьайыыларын хамсаныы, үҥкүү нөҥүө көрдөрдүлэр. Үөһээ халлаан хаттыгаһыгар туран, дьон олоҕор дьайалларын, иэдээҥҥэ-алдьархайга түбэстэхтэринэ көмөлөһөллөрүн илэ-бааччы көрдүбүт. Бу ордук ыччат дьоҥҥо туһалаах, толкуйдатар, көрүүлэрин кэҥэтэр буолуохтаах.
Итэҕэл, сиэр-майгы тиэмэтэ дириҥник хорутуллан арыллыбыта мээнэҕэ буолбатах. Либретто ааптарынан, сүбэһитинэн уһуйааччы, фольклорист, алгысчыт, саха итэҕэлин дириҥник билэр, үөрэтэр Афанасий Федоров буолар.
Аны, уота-күөһэ, видео-ойуулар, тыаһа-ууһа, муусуката эмиэ мындырдык аттарыллан, дьэрэкээнник дьүөрэлэнэн, ис хоһоонун арыйар курдук оҥоһуллубут. Сорох түгэннэргэ «Кыл Саха» ансаамбыл кыл кырыымпа дьүрүскэн дорҕооннорунан киэргэппитэ дьиҥ сахалыы тыыны биэрдэ. Тыйаатыр эдэр үҥкүүһүттэрэ хамсаналлара имигэһин, быһыылара-таһаалара чочуонайын!
Онон туруорааччы режиссер, хореограф Изабелла Егорова премьерата табылынна, көрөөччүлэр сөбүлээтилэр диэн этэр тоҕоостоох.
Композитор: Моисей Кобяков.
Туруорааччы худуоһунньук: Екатерина Шапошникова.
Ангелина Васильева, “Саха сирэ” хаһыат, edersaas.ru
Хаартыскалар: Үҥкүү тыйаатырын архыыбыттан.
