Быйыл Евразия норуоттарын таҥастарын XXI «Этно-Эрато» куонкуруһугар Саха сирин 17 улууһуттан модельердар, дизайнердар 70 араас кэлиэксийэни аҕалан көрдөрдүлэр.
2013 сыллаахха ыытыллыбыт куонкуруска уонча улуустан 20-чэ эрэ кэлиэксийэ баара.
— Онон Москваҕа сыл аайы дьоммутун “Этно-Эрато” куонкуруска кытыннарар үлэбит түмүгэ бу быйылгы тэрээһиҥҥэ дьэҥкэтик көһүннэ. Бүлүү бөлөх, илин эҥэр, киин улуустар модельердарын “буочардара” чыҥха атын хаачыстыбаламмыт.
Кэрэхсэбиллээҕэ баар, хоту улуустар инники күөҥҥэ таҕыстылар. Өссө 2013 сыллаахха Саха сиригэр хотугу норуоттар үҥкүүлэрин, испэктээхтэрин туруорар буолан, көстүүм саҥа көрүҥэ көстөн, биһиги, нууччалыыттан тылбаастаабакка эрэ тиэртэхпинэ, “Сценический костюм в действии” диэн номинацияны киллэттэрбиппит.
Быйыл бу түһүмэххэ бэрт үгүс көстүүм кэлиэксийэтин биһирии көрдүбүт. Хоту улуустартан Аллараа Халыма уонна Анаабыр улуустарын модельердарын көстүүмнэрэ бастыҥынан ааттаннылар. Өймөкөөн улууһуттан Тымныы полюһун хаһаайынын Чысхааны арыаллыыр Муус Хайа уонна Үрүҥ Таба көстүүмнэрэ кыттыыны ыллылар.
Ол эрээри кинилэр куолаан сценическэй көстүүмү буолбакка, биирдиилээн иистэнньэҥнэр үлэлэрин көрдөрдүлэр. Бэйэлэрэ этэллэринэн, Чысхааны арыаллыыр өссө 5 көстүүм эбии баар буолуохтаах үһү. Оччотугар барыта силигин ситтэҕинэ, “Этно Эратоҕа” толору кэлиэксийэнэн бириискэ тиксэр кыттар гына кыттыахтарын сөп, — диэн бэлиэтиир саха норуотун ускуустубатын уонна уус-уран оҥоһуктарын “Симэх” национальнай киинин дириэктэрэ, РФ култууратын үтүөлээх үлэһитэ Яна Игнатьева.
Дьокуускайга Норуоттар икки ардыларынааҕы этнический муода киинэ аһыллар этиини “Евразия дьахталларын пуорума” эригийиэннээҕи уопсастыбаннай тэрилтэ сүрүннүүр сэбиэтин салайааччыта, “Нация киэн туттуута” бастакы бүтүн Арассыыйатааҕы бириэмийэ лауреата, 20 сыл устата үлэлиир Евразия норуоттарын таҥастарын “Этно-Эрато” куонкурустарын ааптара Раушан Канапьянова киллэрдэ. Кини бэлэтииринэн, Саха сирин модельердара туспа буочардарынан “креативнай” дэнэр аныгы муодаҕа инники күөҥҥэ таҕыстылар. “Аҥардас саха национальнай көстүүмэ хайдахтаах курдук кэлиҥҥи сылларга сайдан, Арассыыйаҕа эрэ буолбакка, аан дойдуга тиийэ билиннэ”, — диэн бэйэтин санаатын тиэртэ Раушан Канапьянова.
Салгыы видео-устууну көрүҥ.
Елена ПОТОЦКАЯ, «Саха сирэ» хаһыат.